హైకోర్టు న్యాయవాద దంపతులు వామన్‌రావు-నాగమణి హత్యకేసులో మరొకరు అరెస్టు అయ్యారు. ఈ హత్య కేసులో నిందితుడిగా ఉన్న బిట్టు శ్రీనుకు సహకరించిన మంథనికి చెందిన కాపు అనిల్‌ను పోలీసులు మంగళవారం అరెస్టు చేశారు. ఈ కేసులో ఇప్పటివరకు పోలీసులు ఐదుగురిని అరెస్టు చేశారు. మంగళవారం బిట్టు శ్రీనును పోలీసులు కోర్టులో హాజరుపరిచారు. న్యాయస్థానం విచారణ జరిపి అతడికి 14 రోజుల జ్యుడీషియల్‌ రిమాండ్‌ విధించింది. ఈ హత్య కేసులో బిట్టుశ్రీను నిందితులకు మారణాయుధాలు, వాహనం సమకూర్చాడని అభియోగాలున్నాయి.
మంగళవారం సాయంత్రం నిందితులు కుంట శ్రీనివాస్, శివందుల చిరంజీవి, అక్కపాక కుమార్లను 164 సీఆర్పీసీ వాంగ్మూలం కొరకు మంథని కోర్టులో హాజరు పరిచారు. మెజిస్ట్రేట్ ముందు నిందితుల వాంగ్మూలం నమోదు చేశారు. అనంతరం వరంగల్ కేంద్ర కారాగారానికి తరలించారు.
రాష్ట్ర హైకోర్టు న్యాయవాదులుగా పనిచేస్తున్న మంథనికి చెందిన వామన్‌రావు-నాగమణి దంపతులు ఫిబ్రవరి 17న పెద్దపల్లి జిల్లాలో దారుణహత్యకు గురయ్యారు. కారులో హైదరాబాద్‌ వస్తుండగా పెద్దపల్లి జిల్లా రామగిరి మండలం కల్వచర్ల వద్ద కుంట శ్రీను ఇతరులతో కలిసి ఈ హత్యకు పాల్పడ్డాడని పోలీసులు కేసు నమోదు చేశారు.
ఇదీ చదవండి: వామన్‌రావు దంపతుల హత్య కేసులో సాక్షుల వాంగ్మూలాలు నమోదు
