భర్తతో వివాదం...గోదావరిలో భార్య మృతదేహం...

భర్తతో చిన్న గొడవ... ఆ ఇల్లాలు ప్రాణాలు తీసుకునేలా చేసింది. తల్లితో పాటు ఉండాల్సిన రెండేళ్ల పాప ఆచూకీ దొరకడం లేదు.

నిర్మల్ జిల్లా బాసరలో విషాద ఘటన చోటు చేసుకుంది. గోదావరి నదిలో గుర్తు తెలియని మహిళ(29) మృతదేహం లభ్యమైంది. బ్రిడ్జి వద్ద నీటిపై తేలి ఆడటంతో పోలీసులు రంగంలోకి దిగారు. గజ ఈతగాళ్లతో బయటకి తీయించారు. నిజామాబాద్ నుంచి వెతుక్కుంటూ గోదావరికి చేరుకున్న భర్త... భార్య భవాని ఈ లోకంలో లేదని తెలిసి బోరుమన్నాడు. ఉదయం తమ మధ్య చిన్న గొడవ జరిగిందని... కోపంతో రెండేళ్ల పాపని తీసుకొని బయటకొచ్చిందని భర్త నికేష్ తెలిపాడు. పొద్దుటి నుంచి వెతుకుతుంటే శవమై కనిపించిందని కన్నీరుమున్నీరయ్యాడు.

పాప ఆచూకీ తెలియడం లేదని ఎలాగైనా సరే తన పాపని వెతికి పట్టుకొమ్మని పోలీసులను బతిమాలుతున్నాడు.