Minister Indrakaran Reddy on Governor comments: గవర్నర్ తమిళిసై యాదాద్రికి వెళ్లే 20 నిమిషాల ముందు చెబితే ప్రొటోకాల్ ఏర్పాటు చేయడం ఎలా సాధ్యమవుతుందని దేవాదాయ శాఖ మంత్రి ఇంద్రకరణ్ రెడ్డి ప్రశ్నించారు. గవర్నర్ హుందాగా వ్యవహరిస్తేనే ఆమెకిచ్చే గౌరవం ఉంటుందని.. రాజ్యాంగపరంగా మర్యాద తప్పక ఇస్తామని స్పష్టం చేశారు. తెలంగాణలో పాలనపై గవర్నర్ తమిళిసై వ్యాఖ్యల పట్ల మంత్రి ఇంద్రకరణ్ రెడ్డి స్పందించారు. నిర్మల్ జిల్లా కేంద్రంలోని మంత్రి నివాసంలో ఆయన విలేకరులతో మాట్లాడారు.
"గవర్నర్ తమిళిసై.. కేంద్రమంత్రి అమిత్ షాను కలిసిన తర్వాత రాష్ట్రంలో పాలనపై ఆరోపణలు చేశారు. రాష్ట్రంలో తనను అవమానపరుస్తున్నారని అనడం సరికాదు. ఆమెను ఎక్కడ అవమానించారో చెప్పాలి. యాదాద్రికి వెళ్లే 10, 20 నిమిషాల ముందు చెబితే ప్రొటోకాల్ ఏర్పాటుచేయడం ఎలా సాధ్యమవుతుంది?. రాజ్యాంగబద్ధంగా గవర్నర్కు ఇచ్చే మర్యాద తప్పకుండా ఇస్తాం." -ఇంద్రకరణ్ రెడ్డి, దేవాదాయ శాఖ మంత్రి
రాజకీయ పార్టీ నుంచి ఎవరూ రాలేదు: ఇప్పటివరకు ఐఏఎస్, ఐపీఎస్లే గవర్నర్లుగా వచ్చారని.. రాజకీయ పార్టీ నుంచి కాదని మంత్రి ఇంద్రకరణ్ రెడ్డి అన్నారు. గవర్నర్ ఎప్పుడూ భాజపా వైపే చూస్తారని.. ఆమె మాటలు ఎవరూ నమ్మే అవకాశం లేదని వెల్లడించారు. తమిళిసై హుందాగా వ్యవహరిస్తేనే ఆమెకు గౌరవం ఉంటుందని స్పష్టం చేశారు.
ఇదీ చదవండి: గవర్నర్ వ్యాఖ్యలపై స్పందించిన మంత్రి కేటీఆర్.. ఏమన్నారంటే..?
