కౌలు రైతుకు ఏదీ బీమా...?

కౌలు రైతులకు బీమా వర్తింప చేసేలా ప్రభుత్వం చర్యలు తీసుకోనుంది. ఈ ఏడాది గడువు ముగిసే లోపు బీమా వర్తించేలా అవకాశం కల్పించనుంది. సాధారణ పత్తి, మొక్కజొన్న, మిరప తదితర పంటలు సాగు చేసిన కౌలు రైతులకు బీమా పథకం వర్తిస్తుంది. అయితే క్షేత్ర స్థాయిలో దీని అమలుకు నిబంధనలు అడ్డు వస్తున్నాయని అధికారులు చెబుతున్నారు.

రైతుబంధు పథకంలో పట్టా ఉన్న రైతులకే పెట్టుబడి అంటున్న రాష్ట్ర ప్రభుత్వం అదే పొలాన్ని కౌలుకు తీసుకొని సాగుచేస్తున్న రైతుకు మాత్రం మొండిచెయ్యి చూపించింది. ఈ విధానం వల్ల పట్టా ఉన్న రైతులు స్వయంగా సాగు చేయకపోయినా వారికి ఇటు పెట్టుబడి సొమ్ము, అటు కౌలు రెండూ చేతికి అందుతున్నాయి. కౌలు రైతులకు మాత్రం ప్రయోజనం లేకుండా పోయింది. ఈ విషయాన్ని దృష్టిలో పెట్టుకునే.. కౌలురైతు సాగుచేసిన పంట నష్టపోతే కనీసం బీమాతోనైనా ఆదుకోవాలని రాష్ట్ర వ్యవసాయశాఖ నిర్ణయించింది. ఉద్దేశం మంచిదే అయినా.. నిబంధనల మేరకు అమలు చేయాలంటే క్షేత్రస్థాయిలో కష్టమేనని చెప్పాలి. కిందటి ఏడాది వరకు కౌలు రైతుకు కనీసం పంటల బీమాకు అవకాశం కూడా లేకపోగా.. ఈ ఏడాది బీమా గడువు ముగిసేలోపు వ్యవసాయశాఖ ఈ అవకాశం కల్పించనుంది. మూడు రోజుల క్రితం రాష్ట్ర రాజధానిలో జరిగిన వ్యవసాయశాఖ సమీక్షలో ఆ శాఖ ముఖ్య కార్యదర్శి వ్యవసాయశాఖ అధికారులకు ఈ మేరకు ఆదేశాలు ఇచ్చినట్లు తెలిసింది. ఉమ్మడి పాలమూరు జిల్లాలో కౌలు రైతులు ఎక్కువగా గద్వాల జిల్లాలోనే ఉన్నారు. వీరిలో చాలామంది విత్తనపత్తి సాగు కోసం భూములు కౌలుకు తీసుకున్నారు. బీమా నిబంధనల మేరకు విత్తనపత్తి సాగు రైతులకు ఈ సౌకర్యం వర్తించదు. సాధారణ పత్తి, మొక్కజొన్న, మిరప తదితర పంటలు సాగు చేసిన కౌలు రైతులకు బీమా పథకం వర్తిస్తుంది.

నిబంధనలే ఆటంకం

కౌలు రైతులు బీమా చేసుకోవాలంటే మొదట పట్టాదారుతో కౌలు పత్రాన్ని రాయించుకోవాల్సి ఉంటుంది. వ్యవసాయశాఖ అధికారుల అనుమతితో బీమా సొమ్ము చెల్లించి పంట బీమా చేయించాల్సి ఉంటుంది. పంటనష్టం జరిగితే కౌలు రైతుకే పంటల బీమా తాలూకు సొమ్ము ఇవ్వండని పట్టారైతు కౌలు అంగీకారపత్రంలో స్పష్టంగా పేర్కొంటూ రాసి ఇవ్వాల్సి ఉంటుంది. ఇప్పుడున్న పరిస్థితుల్లో ఇది సాధ్యమేనా అన్న సందేహాలు వ్యక్తం అవుతున్నాయి. దీనికి ప్రత్యామ్నాయంగా ప్రభుత్వమే కౌలు రైతులకు ప్రత్యేక గుర్తింపు కార్డులు ఇచ్చి బీమాకు ప్రొత్సహిస్తే కొంత వరకైనా ప్రయోజనం ఉంటుందనే వాదన వినిపిస్తోంది. స్థానిక మీసేవా కేంద్రాల ద్వారా కౌలు రైతులు బీమా ప్రీమియం సొమ్ము చెల్లించి పంటల బీమా చేసుకునే విధంగా విస్తృత ప్రచారం చేపట్టాలని వ్యవసాయ శాఖ ముఖ్య కార్యదర్శి సూచించినట్లు తెలిసింది. ఉమ్మడి పాలమూరు జిల్లాలో అత్యధికంగా ఉన్న కౌలు రైతులకు ఇప్పటికీ ఈ విషయంపై ప్రాథమిక అవగాహన కూడా లేని పరిస్థితి ఉంది. ఉమ్మడి జిల్లా వ్యాప్తంగా దాదాపు 26 వేల మంది కౌలురైతులు ఉన్నారని, ప్రభుత్వ నిర్ణయం అమలైతే అందులో కనీసం సగం మందికైనా మేలు జరుగుతుందని అధికారులు అభిప్రాయపడుతున్నారు. దీనికి సంబంధించిన విధివిధానాలు ఇంకా ఖరారు కావాల్సి ఉంది.

ఇదీ చూడండి : అధికారుల నిర్లక్ష్యంతో... ప్రభుత్వ ఆదాయానికి గండి