నల్గొండ జిల్లాలో తల్లి కళ్లెదుటే తన కుమారుడు ఆక్సిజన్ అందక కరోనాతో మృతి చెందిన ఘటనపై... దినపత్రికలలో వచ్చిన కథనాల ఆధారంగా రాష్ట్ర మానవ హక్కుల కమిషన్ సుమోటోగా కేసు స్వీకరించింది. ఆగష్టు 21లోగా ఈ ఘటన పై సమగ్ర నివేదిక ఇవ్వాలని నల్గొండ ప్రభుత్వ ఆసుపత్రి సూపరింటెండెంట్ను ఆదేశించింది. జిల్లా ప్రభుత్వ ఆసుపత్రిలో కొవిడ్-19 వార్డులో ఆక్సిజన్ అందక మాడుగులపల్లి మండలం సల్కునూర్‌కి చెందిన వ్యక్తి ఈనెల 18న మరణించాడు.
బాధితుడు ఆసుపత్రిలో ఉదయం చేరగా... సాయంత్రం వరకు ఒక్క వైద్యుడు కూడా రాకపోవటం వల్ల బెడ్ మీదనే ప్రాణాలు కోల్పోవడంపై హెచ్చార్సీ ఆగ్రహం వ్యక్తం చేసింది. బాధితునికి కరోనా పరీక్షలు ఎప్పుడు చేశారు.. పాజిటివ్ అని నిర్ధరణ కాకుండానే కొవిడ్ వార్డులో ఎందుకు చేర్చారు.. చేర్చుకున్నాక ఆక్సిజన్ ఎందుకు పెట్టలేదంటూ.. సూపరింటెండెంట్పై హెచ్చార్సీ ప్రశ్నల వర్షం కురిపించింది. కొవిడ్ వార్డుకు ఇతరులు పోవడానికి ఆనుమతి లేనప్పుడు ఆ తల్లి ఎలా పోయింది.. ఎవరైనా ఆపారా లేదా అని ప్రశ్నించింది.
