Threat to wildlife nallamala forest: వన్యప్రాణులకు ప్రాణ సంకటంగా వాహనాలు..

అమ్రాబాద్ పులుల అభయారణ్యంలో వాహనాల వేగం వన్య ప్రాణులకు(Threat to wildlife nallamala forest) సంకటంగా మారుతోంది. మితిమీరిన వేగంతో ప్రయాణించే వాహనాల కారణంగా కోతులు, పాములు, జింకలు, పక్షులు ఇలా అనేక రకాల జంతువులు మృత్యువాత పడుతున్నాయి. నాలుగేళ్లలో 200లకు పైగా జంతువులు ప్రమాదాల బారిన పడ్డాయి. నీళ్లు, ఆహారం కోసం అడవిని దాటే క్రమంలో వాహనాల టైర్ల కింద నలిగిపోతున్నాయి.

హైదరాబాద్ - శ్రీశైలం ప్రధాన రహదారిపై వాహనాల వేగం.. అమ్రాబాద్ పులుల అభయారణ్యంలోని(Amrabad tiger reserve forest) వన్యప్రాణులకు ప్రాణ సంకటంగా మారుతోంది. మన్ననూరు చెక్ పోస్టు నుంచి దోమలపెంట వరకు జాతీయ రహదారి రిజర్వ్ ఫారెస్ట్ నుంచి వెళ్తుంది. ఈ మార్గంలో నిత్యం వందలాది బస్సులు, కార్లు, లారీలు, ప్రైవేటు వాహనాలు, ద్విచక్ర వాహనాలు తిరుగుతుంటాయి. అడవుల్లో సంచరించే చిరుతలు, పులులు, కోతులు, పాములు, అడవి పందులు, పక్షులు, ఉడుములు, జింకలు తదితర జంతువులు రోడ్డు దాటే క్రమంలో ప్రమాదాలకు గురై మృత్యువాత పడుతున్నాయి. ఆహారం, నీళ్ల కోసం రోడ్డుదాటే క్రమంలో వాహనాల టైర్ల కింద నలిగి ప్రాణాలు కోల్పోతున్నాయి.

ఎక్కువగా కోతులే..

రోడ్డు ప్రమాదాల్లో ఎన్ని వన్య ప్రాణులు(Nallamala forest animals) మృత్యువాత పడుతున్నాయన్న దానిపై అటవీశాఖ గణాంకాలు నమోదు చేస్తోంది. 2017 నుంచి 2021 వరకూ సుమారు 200లకు పైగా జంతువులు ప్రాణాలు కోల్పోయాయి. ఇందులో అత్యధిక ప్రమాదాలు జరిగింది... అక్టోబర్ మాసంలోనే. చనిపోయిన జంతువుల్లో అధికశాతం కోతులు కాగా, కట్లపాములు, మన్నుతినే పాములు, చుక్కల దుప్పులు, కొండముచ్చులు, ఉడుములు, రక్త పింజరలు, జింకలు...ఇలా అనేకం ఉన్నాయి.

నిబంధనలు బేఖాతరు

అభయారణ్యంలో వాహనదారులు నిబంధనలు పాటించడం లేదు. ప్రభుత్వ వాహనాలైన ఆర్టీసీ బస్సులు సైతం వేగాన్ని పాటించడం లేదనే విమర్శలున్నాయి. మితిమీరిన వేగం కారణంగా ఎదురుగా వచ్చిన జంతువులను గుర్తించినా నియంత్రించలేని పరిస్థితుల్లో వాహనదారులు జంతువులను ఢీకొట్టి వెళ్లిపోతున్నారు.

అటవీ జంతువుల రాకపోకలకు భంగం కలగకుండా ఉండేందుకు రాత్రి 9 గంటల నుంచి ఉదయం 6 గంటల వరకు అభయారణ్యంలోకి వాహనాలను అనుమతించరు. అయినా...ప్రమాదాలు మాత్రం తగ్గడంలేదు. భవిష్యత్తుల్లో వేగాన్ని నియంత్రించేందుకు నిబంధనలు కఠినంగా అమలు చేస్తాం. లేజర్ స్పీడ్ గన్స్ ఏర్పాటు చేస్తాం.

-శ్రీనివాస్, అమ్రాబాద్ టైగర్ రిజర్వ్ ఫీల్డ్ డైరెక్టర్

మరింత ముప్పు

ప్రస్తుతం రెండు లైన్ల రహదారి అమల్లో ఉంటేనే వందల సంఖ్యలో వన్య ప్రాణులు ప్రాణాలు కోల్పోతున్నాయి. రహదారిని విస్తరిస్తే...వన్య ప్రాణులకు మరింత ముప్పు(nallamala forest dangerous) తప్పదని అటవీశాఖ అధికారులు ఆందోళన వ్యక్తం చేస్తున్నారు.

ఇవీ చదవండి: