మేడారం జాతరలో ఉచితంగా బట్టలు ఉతికిస్తారండోయ్..

కొనుగోలుదారుల దగ్గరికి వెళ్లి వారి ఉత్పత్తులను కొనుగోలు చేసేలా ఆకర్షించడం వ్యాపారస్థుల సూత్రం. కానీ ఓ కంపెనీ వాళ్లు మేడారం జాతరలో వెరైటీ మార్కెటింగ్ చేస్తున్నారు. పుణ్యానికి పుణ్యం..మార్కెటింగ్​కి మార్కెటింగ్ వస్తుందనే ఆలోచనతో ఏంచేస్తున్నారో చూడండి..

మేడారం జాతరకు దేశ నలుమూలల నుంచి భక్తులు తరలొస్తుంటారు. ఈ అతిపెద్ద జాతరను ఓ వాషింగ్​ మెషిన్ల కంపెనీ మంచి మార్కెటింగ్​ మార్గంగా ఎంచుకుంది. భక్తులకు ఉచితంగా బట్టలు ఉతికిస్తామంటూ ముందుకొచ్చింది. జనసంద్రంగా మారిన జాతరలో భక్తులకు సేవ చేస్తే పుణ్యానికి పుణ్యం..తమ ఉత్పత్తులపై ప్రజలకు నమ్మకం కలిగించొచ్చని ఇలా వెరైటీగా మార్కెటింగ్ చేస్తోంది.

దాంతో పాటు ఉచిత తాగునీరు, మాస్క్​లు పంపిణీ చేస్తుంది. మేడారానికి వచ్చే భక్తుల సౌకర్యార్థం 40 వాటర్ ప్యూరిఫైయర్లు, 30 వాషింగ్ మిషన్లను ఏర్పాటు చేసింది.

ఈ ఉచిత సేవలు జాతర అయిపోయే వరకు కొనసాగిస్తామని ఆ కంపెనీ ప్రతినిధి మోహర్​ తెలిపారు. ఉచితంగా బట్టలు ఉతికిస్తుండటంతో భక్తులు సంతోషం వ్యక్తం చేస్తున్నారు.