చెదురు మదురు ఘటనలు మినహా హైదరాబాద్, మేడ్చల్ మల్కాజిగిరి జిల్లాల పరిధిలో పట్టభద్రుల ఎమ్మెల్సీ ఎన్నికల పోలింగ్ ప్రశాంతంగా జరిగింది. ఫలితంగా అధికార యంత్రాంగం ఊపిరి పీల్చుకొంది.
అల్వాల్ మున్సిపల్ పరిధిలోని 135వ డివిజన్లో పోలింగ్ కేంద్రం వద్ద తెరాస నేతలు, పోలీసులకు స్వల్ప వాగ్వాదం చోటుచేసుకుంది. వెంకటాపురం ప్రాథమిక ఉన్నత పాఠశాలలో పోలింగ్ బూత్లోకి గులాబీ టీ షర్ట్లతో తెరాస ఏజెంట్లు వచ్చారు. అక్కడున్న పోలింగ్ సిబ్బంది అభ్యంతరం తెలిపారు.
అడ్డుకునేందుకు యత్నించిన పోలీసులతో వారు వాగ్వాదానికి దిగారు. సురారం కాలనీ నీలిమ పాఠశాలలోనూ తెరాస కార్యకర్తలు గులాబీ రంగు టీ షర్ట్లతో రావడంపై ఇతర పార్టీల, స్వతంత్ర అభ్యర్థులు అభ్యంతరం తెలిపారు.
కార్వాన్లోని కుస్లుంపుర ప్రభుత్వ పాఠశాలలో ఏర్పాటు చేసిన పోలింగ్ కేంద్రంలో జియాగూడ కార్పొరేటర్ దర్శన్, మాజీ కార్పొరేటర్ మిత్ర కృష్ణ మధ్య స్వల్ప వాగ్వాదం చోటుచేసుకుంది. అక్కడ విధుల్లో ఉన్న పోలీసులు ఇరువురిని శాంతింపజేశారు. మీర్పేటలోని పోలింగ్ కేంద్రంలో ఓటు వేసే క్రమంలో అనూష అనే యువతి కళ్లు తిరిగి కింద పడిపోయింది. అప్రమత్తమైన పోలీసులు స్థానిక ఆస్పత్రికి తరలించారు.
ఈ జిల్లాల పరిధిలో ఇక్కడ ఓటేసిన ప్రముఖులు..
- పురపాలక, ఐటీ, పరిశ్రమల శాఖ మంత్రి కేటీఆర్.. షేక్‌పేట్ తహసీల్దార్ కార్యాలయంలో ఓటు వేశారు.
- రాజేంద్రనగర్ నియోజకవర్గంలోని ఉప్పర్పల్లి అమర్ ఇంటర్నేషనల్ పాఠశాలలో ప్రభుత్వ ప్రధాన కార్యదర్శి సోమేశ్కుమార్ ఓటు హక్కును వినియోగించుకున్నారు.
- బంజారాహిల్స్ రోడ్ నంబర్-13లోని నీటిపారుదల శాఖ కార్యాలయం ఏర్పాటుచేసిన పోలింగ్ కేంద్రంలో నగర మేయర్ గద్వాల్ విజయలక్ష్మి ఓటేశారు.
- కుత్బుల్లాపూర్ ఎస్వీఎన్ పాఠశాలలో స్థానిక ఎమ్మెల్యే వివేకానంద ఓటు హక్కును వినియోగించుకున్నారు.
- కూకట్‌పల్లి కేపీహెచ్బీ కాలనీలో ఎమ్మెల్సీ నవీన్రావు ఓటేశారు.
- మలక్పేటలో అగ్రికల్చర్ కార్యాలయంలో హోంమంత్రి మహమూద్ అలీ ఓటు హక్కు వినియోగించుకున్నారు.
- తార్నాక సంఘీ పాఠశాలలో భాజపా ఎమ్మెల్సీ అభ్యర్థి రాంచందర్రావు ఓటేశారు.
- రామంతాపూర్లో ఉప్పల్ మాజీ ఎమ్మెల్యే ఎన్వీఎస్ఎస్ ప్రభాకర్ ఓటు హక్కు వినియోగించుకున్నారు.
- గాంధీనగర్లోని తూనికలు కొలతల శాఖ కార్యాలయంలో ఏర్పాటుచేసిన పోలింగ్ కేంద్రంలో భాజపా ఓబీసీ మోర్చా జాతీయ అధ్యక్షుడు డాక్టర్ కె.లక్ష్మణ్, ముషీరాబాద్ ఎమ్మెల్యే ముఠా గోపాల్ ఓటు వేశారు.
- హిమాయత్నగర్లోని ఉర్దూ పాఠశాలలో ఎమ్మెల్సీ ఎన్నికల స్వతంత్ర అభ్యర్థి ప్రొఫెసర్ కె.నాగేశ్వర్ ఓటు హక్కు వినియోగించుకున్నారు.
ఇవీచూడండి: భారీగా తరలివచ్చిన పట్టభద్రులు... 60 శాతానికి పైగా పోలింగ్!
