కారులోనే కార్యాలయం.. కోట్లలో అక్రమాలు.. విచారణలో విస్తుపోయే వాస్తవాలు

రాంపల్లి భూ వ్యవహారంలో లంచం తీసుకుంటూ పట్టుబడిన కీసర తహసీల్దార్ నాగరాజు కేసు దర్యాప్తులో ఆసక్తికర విషయాలు బయటకు వస్తున్నాయి. కారునే ఓ కార్యాలయంలా మార్చిన నాగరాజు... రహస్య అరలో అక్రమార్జనకు సంబంధించిన పత్రాలు, నగదు దాచినట్లు వెల్లడైంది.

కోటి రూపాయలకు పైగా లంచం తీసుకుంటూ పట్టుబడిన తహసీల్దార్ నాగరాజు కేసును అనిశా అధికారులు మరింత లోతుగా దర్యాప్తు చేయనున్నారు. ఇందుకోసం తహసీల్దార్ సహా మరో ముగ్గురిని కస్టడీలోకి తీసుకునేందుకు అనిశా అధికారులు పిటిషన్ వేశారు. ఇప్పటికే నాగరాజు అవినీతిపై అనిశా అధికారులు కీలక ఆధారాలు సేకరించారు. గతంలో ఆదాయానికి మించిన ఆస్తులు కూడబెట్టిన కేసులో అరెస్టైన నాగరాజు... ఈ సారి మరింత జాగ్రత్తపడినట్లు తెలిసింది. కారునే కార్యాలయంగా మా‌ర్చినట్లు సమాచారం. రహస్య ఒప్పందాలు కుదుర్చుకుంటున్న ఆయన... వాటికి సంబంధించిన పత్రాలు, నగదును తన కారులోని రహస్య అరలో దాచేవాడు. చివరికి తన బ్యాంక్ ఖాతా పాసుపుస్తకం కూడా కారులోనే ఉంచాడు. లంచం తీసుకుంటూ పట్టుబడిన రోజు అధికారులు... కారును నాలుగైదుసార్లు తనిఖీలు చేయగా.. 8 లక్షల నగదు, బ్యాంక్ పాసుపుస్తకం, కీసర మండలంలో భూములకు సంబంధించిన దస్త్రాలు కనిపించాయి.

విడాకుల నాటకం

తహసీల్దార్ ఇంట్లో అనిశా అధికారులు స్వాధీనం చేసుకున్న 28 లక్షల నగదు, బంగారు ఆభరణాల విషయం వెనుక నాటకీయ పరిణామాలు చోటుచేసుకున్నట్లు తెలిసింది. నగదు, బంగారాన్ని అనిశా అధికారులు తీసుకుని వెళ్లకుండా నాగరాజు దంపతులు విడాకుల నాటకాన్ని తెరపైకి తెచ్చినట్లు తెలిసింది. ఇంట్లో సోదాలకు వెళ్లిన ఏసీబీ అధికారులతో.... తహసీల్దార్‌ నాగరాజుతో తనకు సంబంధం లేదని ఆయన భార్య చెప్పినట్టు సమాచారం. విడాకులకోసం కోర్టును ఆశ్రయించినట్లు పేర్కొన్న ఆమె..... ఇల్లు, నగదు, ఆభరణాలు తనకే చెందుతాయని వివరించింది. నాగరాజుకు ఫోన్ చేసి విడాకుల విషయం చెప్పగా..... ఆయన కూడా అవుననే చెప్పాడు. చివరికి తమదైన శైలిలో విచారించిన అధికారులు....తహసీల్దార్‌ నాగరాజు ఇంట్లో సోదాలు నిర్వహించి పంచనామాపై ఆయన భార్య సంతకం తీసుకున్నట్లు సమాచారం.

వారి గురించి కూపీ లాగుతున్నారు

మరోపక్క... ఈ కేసుకు సంబంధించిన స్థిరాస్తి వ్యాపారులు అంజి రెడ్డి, శ్రీనాథ్, యుగేందర్ ఇళ్లు, స్థిరాస్తి కార్యాలయంలో అనిశా అధికారులు సోదాలు చేశారు. కోటి 10 లక్షల లంచం ఇచ్చేందుకు.. అంత డబ్బు ఎలా సమీకరించారనే దానిపై అధికారులు ఆరా తీస్తున్నారు. అంజి రెడ్డి, శ్రీనాథ్ ఇచ్చిన కోటికి పైగా డబ్బుకు సంబంధించి అనిశా అధికారులు ఆదాయవు పన్ను అధికారులకు కూడా సమాచారం ఇచ్చారు. ఇంకా ఎవరైనా వీరి వెనక ఉన్నారా అనే కోణంలో వివరాలు సేకరిస్తున్నారు. తహసీల్దార్ నాగరాజు ఇల్లు, కార్యాలయంలో దొరికిన విలువైన ఆస్తులు, భూమి పత్రాలపై ఆరా తీస్తున్నారు. గతంలో నాగరాజు అవినీతి అక్రమాలపై కూడా దర్యాప్తు చేస్తున్నారు.

ఇదీ చూడండి : 'మెడికల్ హబ్​గా హైదరాబాద్​ మహానగరం'