సమీకృత వ్యవసాయం లాభదాయకం: మెదక్​ కలెక్టర్​

సమీకృత వ్యవసాయ విధానంపై మెదక్​లో అవగాహన సదస్సు నిర్వహించారు. సమీకృత వ్యవసాయం వల్ల కలిగే లాభాలను రైతులకు వివరించారు. కార్యక్రమానికి రాష్ట్ర ఖనిజాభివృద్ధి సంస్థ ఛైర్మన్​ సుభాష్​రెడ్డి, కలెక్టర్​ ధర్మారెడ్డి  హాజరయ్యారు. జిల్లాలోని 20 మండలాల అన్నదాతలతో చర్చించి పలు సూచనలు ఇచ్చారు.

అధికారం చేతిలో ఉన్నా వ్యవసాయం మీద మక్కువ తగ్గలేదు ఆ అధికారికి. తనకున్న పోలంలో ప్రయోగాత్మకంగా పంటలు పండించి ఎందరో రైతులకు ఆదర్శంగా నిలుస్తున్నారు. రాష్ట్ర ఖనిజాభివృద్ధి సంస్థ చైర్మన్​ సుభాష్​రెడ్డికి మెదక్​లో వ్యవసాయక్షేత్రం ఉంది. ప్రాచీన పద్దతుల ద్వారా తక్కువ ఖర్చుతో ఎక్కువ లాభాలు అర్జిస్తున్నారు. వరి, చెరకు పంటలకు ప్రత్యామ్నయంగా బంగాళదుంప, గుమ్మడి సాగు చేసి రూ.80 వేలు లాభాన్ని పొందారు.

మెదక్ జిల్లాలో మొదటిసారిగా బంగాళదుంప పండడంపై కలెక్టర్​ ధర్మారెడ్డి హర్షం వ్యక్తం చేశారు. ప్రయోగాలు చేసి లాభాలు ఆర్జించిన ఖనిజశాఖ ఛైర్మన్​ను అభినందించారు. రైతులందరూ ఈ పద్ధతులను అనుసరించాలని కోరారు. సమీకృత వ్యవసాయ విధానం ద్వారా ప్రకృతి వైపరీత్యాలు వచ్చినా నష్టం తక్కువగా ఉంటుందని రైతులకు వివరిచారు. ఒకే రకమైన పంటలు వేస్తే గిట్టుబాటు ధరలేక ఇబ్బందులు పడతారని వాటికి అనుబంధ పంటలు ద్వారా నష్టాన్ని భర్తీచేయవచ్చని పేర్కొన్నారు.