వివాహానికి వచ్చి. కాలినడకన తిరుగు ప్రయాణం

వివాహానికి వచ్చారు. తిరిగి వెళ్దామంటే వాహనాలు నడవడం లేదు. లాక్​డౌన్​ కారణంగా ఇళ్లకు ఎలా చేరుకోవాలో తెలియక వివాహానికి వచ్చిన అతిథులు మెదక్​​ నర్సాపూర్​ నుంచి హైదరాబాద్​ ఎర్రగడ్డకు కాలినడకన ప్రయాణం చేస్తున్నారు.

హైదరాబాద్ ఎర్రగడ్డలో నివాసం ఉండే వీణ, శివ, రవి కుటుంబ సభ్యులు మెదక్ జిల్లా నర్సాపూర్ మండలం ఎర్రకుంట తండాకు.. ఈ నెల 20తేదీన వివాహానికి వచ్చారు. తిరిగి వెళ్దామనుకునే సమయానికి కేంద్ర రాష్ట్ర ప్రభుత్వాలు కరోనా కట్టడిలో భాగంగా లాక్​డౌన్​ను ప్రకటించాయి. అంతే ఇంక చేసేదేమీ లేక.. ఆ ఊరిలోనే ఉండలేక.. తమ సొంతిళ్లకు చేరుకోవడానికై నానాయాతన పడుతూ నడక ప్రయాణం చేస్తున్నారు.

కాగా నర్సాపూర్ మల్లన్న గుడి వద్ద ఉన్న పోలీస్ చెక్​పోస్ట్ వద్దకు వారు చేరుకోగానే పోలీసులు వారి వివరాలు తెలుసుకుని అటుగా వచ్చిన వాహనంలో వారిని ఎక్కించి స్వస్థలాలకు పంపించారు. దయాహృదయంతో తమకు సాయం చేసిన పోలీసులకు వారు కృతజ్ఞతలు తెలిపారు.

ఇదీ చూడండి: కరోనాను జయించేందుకు ఇవి తెలుసుకోండి...