సామాజిక సేవలో ముందుండే రామోజీ ఫౌండేషన్ మరోసారి తన దాతృత్వాన్ని చాటుకుంది. మంచిర్యాల జిల్లా కేంద్రంలోని ఇండియన్ రెడ్ క్రాస్ సొసైటీ ఆధ్వర్యంలో నిర్వహిస్తోన్న ఆనందనిలయం వృద్ధుల ఆశ్రమానికి రామోజీ ఫౌండేషన్ చేయూతనందించింది. సామాజిక సేవా దృక్పథంలో భాగంగా... సరైన సౌకర్యాలు లేక ఇబ్బందులు పడుతున్న వృద్ధాశ్రమానికి రామోజీ ఫౌండేషన్ 4.19 లక్షల విలువ గల అవసరమైన సామగ్రిని అందించింది.
ఈనాడు యూనిట్ కరీంనగర్ కార్యాలయ మేనేజర్ యుగంధర్ రెడ్డి చేతుల మీదుగా మంచిర్యాల జిల్లా పాలనాధికారి భారతి హోళీ కేరికి ఈ వస్తువులను అందజేశారు. వృద్ధాశ్రమానికి 65 ఇంచుల ఎల్ఈడీ టీవీ, రిఫ్రిజిరేటర్, గ్రీజర్, వాటర్ ట్యాంక్, డైనింగ్ టేబుళ్లు, మంచాలు, కుర్చీలను రామోజీ సంస్థ కొనుగోలు చేసి అందజేసింది.
ఎల్లప్పుడూ వార్తలతో బిజీబిజీగా ఉండే ఈనాడు రామోజీ సంస్థలు సామాజిక సేవలో పాల్గొని.. ఇండియన్ రెడ్క్రాస్ సొసైటీ వృద్ధాశ్రమానికి చేయూతను అందించడం చాలా ఆనందంగా ఉందని కలెక్టర్ భారతి హోళీ కేరి తెలిపారు. అన్ని సౌకర్యాలు సదుపాయాలు ప్రభుత్వమే అందించాలని చూడకుండా.. స్వచ్ఛంద సంస్థలతో పాటు ఇలా ప్రైవేటు కంపెనీలు కూడా ముందుకు వస్తే చాలా బాగుంటుందని అభిప్రాయం వ్యక్తం చేశారు. వృద్ధులకు ఆశ్రమం ఉండడం సరైంది కాదని.. అసలు అలాంటి అవకాశమే వారికి రాకుండా చూడాలని హోళీకేరి అభిప్రాయపడ్డారు.
ఇలాంటి ఆశ్రమాలే ఉండొద్దు..
"కార్పొరేట్ రెస్పాన్సిబిలిటీ, సామాజిక బాధ్యతలో భాగంగా రామోజీ ఫౌండేషన్ ఇలా ముందుకు రావటం ఎంతో ఆనందం. అందులో భాగంగా మంచిర్యాలలోని ఆనందనిలయం వృద్ధాశ్రమానికి తమ వంతు సాయం చేయటం అభినందించదగ్గ విషయం. ఇలాంటివన్నీ ప్రభుత్వ బాధ్యతే అని కాకుండా.. సామాజిక బాధ్యతలా తీసుకుని కార్పొరేట్ కంపెనీలు కూడా తమవంతు కృషి చేయాలి. నిజానికి అసలు ఇలాంటి ఆశ్రమాలే ఉండకూడదు. పిల్లల్ని కనీ..పెంచి.. పెద్ద చేశాక... తల్లిదండ్రులను ఇలా ఆశ్రమాల్లో వదిలేయటం చాలా బాధాకరం." - హోళీకేరీ, మంచిర్యాల కలెక్టర్
ఇలాంటి మంచి కార్యక్రమంలో పాలుపంచుకోవటం ఆనందకరంగా ఉందని కరీంనగర్ కార్యాలయ మేనేజర్ యుగంధర్ రెడ్డి తెలిపారు. సామాజిక సేవలో రామోజీ ఫౌండేషన్ తన వంతు పాత్ర ఎప్పటికప్పుడు పోషిస్తూనే ఉంటుందని స్పష్టం చేశారు. ఈ కార్యక్రమంలో డెస్క్ ఇంఛార్జ్ శ్రీనివాస్, సబ్ఎడిటర్ ఆరోగ్య రెడ్డి పాల్గొన్నారు.
ఇదీ చూడండి:
