రిటైర్డ్​ డాక్టర్​ చంద్రశేఖర్ ఇంట్లో ఎన్ఐఏ సోదాలు

మంచిర్యాలలోని విశ్రాంత వైద్యుడు చంద్రశేఖర్​ ఇంట్లో ఎన్​ఐఓ అధికారులు ఆకస్మిక తనిఖీలు నిర్వహించారు. మావోయిస్టు నాయకులతో సత్సంబంధాలు నెరుపుతున్నారన్న అనుమానంతో అధికారులు సోదాలు చేసినట్లు తెలుస్తోంది. మావోలకు సంబంధించిన పలు పుస్తకాలు, సీడీలు స్వాధీనం చేసుకున్నారు.

మంచిర్యాలకు చెందిన విశ్రాంత ప్రభుత్వ వైద్యుడు చంద్రశేఖర్ ఇంట్లో ఎన్​ఐఏ అధికారులు సోదాలు జరిపారు. ఈ ఏడాది జూన్ 11న మహారాష్ట్ర పోలీసులు అరెస్టు చేసిన మావోయిస్టు రాష్ట్ర కమిటీ సభ్యులు కిరణ్ కుమార్ అలియాస్ కిరణ్ దాదా, అతని భార్య నర్మద అలియాస్ కృష్ణకుమారితో సత్సంబంధాలు ఉన్నాయన్న అనుమానంతో ఆకస్మిక తనిఖీలు చేశారు. చంద్రశేఖర్ ఇంట్లో ఓ మావోయిస్టు నేత మాట్లాడిన సీడీ, జనతా సర్కార్ పుస్తకం, మావోయిస్టు వార్తలు వచ్చిన పత్రికలు, రూ. 27 వేలు, చరవాణిని అధికారులు స్వాధీనం చేసుకున్నారు. గతేడాది డిసెంబర్​లో క్యాన్సర్ వ్యాధితో బాధపడుతున్న నర్మదా అలియాస్ కృష్ణకుమారి వైద్యం కోసం ఆసుపత్రికి వచ్చిందని... ఆమె పేరు నిర్మల కుమారి అని తెలిపిందని చంద్రశేఖర్ తెలిపారు. ప్రాథమిక వైద్యం అందించి హైదరాబాద్​లోని ఎన్ఎంజీ ఆస్పత్రిలో మెరుగైన వైద్యం కోసం వెళ్లాలని సూచించినట్లు అధికారులకు చంద్రశేఖర్​ తెలిపారు.

ఇదీ చూడండి: వేదికపై ర్యాంప్​వాక్​ చేస్తూ విద్యార్థిని మృతి!