యువరైతు బాధపడితే....
రైతుల సమస్యలకు పరిష్కారాలిస్తూ... సరికొత్త విధానాలను పరిచయం చేస్తూ... ఫేస్బుక్లో ఓ పేజీని నడుపుతున్నాడు యువ రైతు శరత్. కానీ ఓ రోజు తన సమస్యనే వీడియో రూపంలో సీఎంకి చేరువ చేయండంటూ ఆవేదన వ్యక్తం చేశాడు. తన భూమికి సంబంధించి ఉన్న సమస్యను, దానికి గ్రామ అధికారులు వ్యవహరించిన తీరును వీడియోలో వివరించాడు.
ముఖ్యమంత్రే ఫోన్ చేశారు...
వీడియో పెట్టిన పది రోజులకు అనూహ్యంగా... శరత్... నేను సీఎంని మాట్లాడుతున్నా.... మీ సమస్యేంటీ...? అంటూ రాష్ట్ర ముఖ్యమంత్రే ఫోన్ చేసి మాట్లాడారు. సమస్యను అడిగి తెలుసుకున్నారు. బాధితుని గోడును సావదానంగా విన్న సీఎం... న్యాయం చేస్తామని అభయమిచ్చారు.
సీఎంతో ఆవేదన చెప్పుకున్నాడు...
తాతల నాటి నుంచి వస్తున్న తమ జీవనాధార భూమిని వేరొకరు అప్పనంగా పట్టా చేసుకున్నారని శరత్ కుంటుంబసభ్యులు ఆరోపించారు. తహసీల్దార్‌, సబ్‌ కలెక్టర్లకు ఎన్ని సార్లు ఫిర్యాదు చేసినా... సమస్య తీరట్లేదని ఆవేదన చెందాడు. రైతులకు న్యాయం చేసే సీఎంకి ఎలాగైనా తమ ఆవేదన తెలియపర్చాలని తన పేజీలో పోస్టు పెట్టానని శరత్ తెలిపాడు.
గంటల్లోనే సమస్య పరిష్కారం...
ఫోన్ చేసిన గంటలోనే శరత్ ఇంటికి మంచిర్యాల కలెక్టర్‌ హోళికేరి అధికారులతో కలిసి వచ్చారు. సమస్యపై విచారణ జరిపారు. వెంటనే పరిష్కరించటమే కాకుండా ఇప్పటివరకూ రాని రైతుబంధు పథకం డబ్బులు కూడా ఇప్పించారు. దీనంతటికీ కారణమైన వీఆర్వోను కూడా అధికారులు సస్పెండ్ చేశారు.
యువకులకు సీఎం పిలుపు...
సమస్య తీరగానే చల్లబడకుండా రాష్ట్రంలోని తనబోటి యువకులను చైతన్యపరచాలని సీఎం శరత్కు సూచించారు. ప్రభుత్వం రైతులకు మంచి చేసే పనులు చేసినప్పుడు బాసటగా నిలవాలని పిలుపునివ్వటం యువకుల్లో ఉత్సాహం నింపింది.
ఇవీ చూడండి:శరత్... నేను కేసీఆర్ను మాట్లాడుతున్నా...!
