KEERTHY SURESH WEDDING SAREE : తారలు అంటేనే తళక్కున మెరిసిపోవాలి. అప్పుడే అభిమానులు మురిసిపోతారు. అలాంటిది ఇక పెళ్లి వేడుకలో ఇంకెలా కనిపిస్తారు? ఈ అంచనాలకు ఏ మాత్రం తగ్గకుండా పెళ్లి వేళ ముస్తాబైంది కీర్తి సురేశ్. అయితే.. ఆమె ధరించిన పెళ్లిచీర తయారు చేయడానికి వందల గంటలు పట్టిందనే న్యూస్ సోషల్ మీడియాలో వైరల్గా మారింది. మరి, ఆ చీరలో అంత ప్రత్యేకత ఏముంది? ఎక్కడ తయారు చేశారు? వంటి వివరాలు ఇప్పుడు చూద్దాం.
తనదైన అందం, అభినయంతో మాత్రమే కాకుండా.. తన ఫ్యాషన్‌ తోనూ నేటి యూత్ ఐకాన్గా మారిపోయింది కీర్తి సురేశ్. ఆమె ధరించే పార్టీ వేర్, ఫంక్షన్స్ డ్రెస్సులు అభిమానుల మనసు దోచేస్తుంటాయి. అలాంటి బ్యూటీ.. పెళ్లికి ఎలాంటి వస్త్రాలు ధరించనుందనే క్యూరియాసిటీ ఫ్యాన్స్లో కలిగింది. అయితే.. అందరి అంచనాలకు అందకుండా.. అంతకు మించి అనేలా తయారైంది కీర్తి. ఎవరూ ఊహించని విధంగా.. "మడిసర్‌ కట్టు"లో కనిపించి వావ్ అనిపించింది. పెళ్లిరోజున ఆమె ధరించిన చీరలో ఎన్నో స్పెషాలిటీస్ ఉన్నాయి.
పెళ్లి కోసం ఆకుపచ్చ-పసుపు పచ్చ రంగుల్లో తయారైన కాంజీవరం పట్టుచీర ధరించింది కీర్తి. ఈ చీరను కోర్వై నేత పద్ధతిలో రూపొందించారు. చీర, బోర్డర్‌ విడి విడిగా నేశారు. ఆ తర్వాత ఆ రెండింటినీ మిక్స్ చేయడమే ఈ కోర్వై నేత స్పెషాలిటీ! కనీసం దారపు పోగులు కూడా కనపడకుండా కలిసిపోయేలా ఈ రెండింటినీ కలుపుతారు.
చీరపైన కవిత అచ్చు..
కీర్తి కట్టుకున్న ఈ చీర మొత్తాన్ని బంగారు రంగు జరీతో కూడిన జామెట్రిక్‌ చెక్స్‌, అందులో జరీ మోటిఫ్స్‌తో అద్దారు. చీర బోర్డర్‌ అంతా జరీ, ఫ్లోరల్‌ మోటిఫ్స్‌తో డిజైన్‌ చేశారు. ఈ చీర బోర్డర్‌ చివర యాడ్ చేసిన పర్పుల్‌ కలర్‌ ప్లెయిన్‌ పట్టీ.. చీర అందాన్ని మరింత పెంచింది. ఇందులో మరో స్పెషాలిటీ ఏమంటే.. ఈ పెళ్లి చీరపై తన ప్రేమ కవితను కూడా రాయించుకుంది కీర్తి. తమిళ అక్షరాల్లో ఉన్న ఈ లవ్ కవిత.. తానే స్వయంగా రాసుకున్నది కావడం మరో ప్రత్యేకత.
ఈ బ్యూటీఫుల్ సారీని.. ఫేమస్ డిజైనర్ అనితా డోంగ్రే డిజైన్‌ చేశారు. ఈ చీరను తయారు చేయడానికి.. దాదాపు 405 గంటలు పట్టిందట. ఈ చీర తయారీకి సంబంధించిన వీడియోను ఆమె సోషల్ మీడియాలో పోస్టు చేశారు. ఇది వైరల్ అయ్యింది. మరి, దీని ధర ఎంత అన్నది ఆమె చెప్పలేదుగానీ.. సుమారు 3 లక్షల వరకు ఉండవచ్చని నెటిజన్లు అంచనా వేస్తున్నారు.
ఇక సినిమాల విషయానికి వస్తే.. కీర్తి సురేష్ నటించిన మొదటి బాలీవుడ్‌ మూవీ "బేబీ జాన్‌". క్రిస్మస్ సందర్భంగా డిసెంబర్‌ 25న ఈ చిత్రం విడుదల కాబోతోంది. ఈ మూవీ ప్రమోషన్స్‌లో ఉల్లాసంగా పాల్గొంటోంది కీర్తి. ఈ కార్యక్రమాల్లో మంగళసూత్రంతోనే కనిపించడంతో.. ఆమెకు సంబంధించిన చిత్రాలు, వీడియోలు వైరల్గా మారాయి.
