నరేశ్​ మృతదేహంతో డిపో ముందు కార్మికుల ఆందోళన...

ఆత్మహత్యకు పాల్పడిన ఆర్టీసీ డ్రైవర్​ నరేశ్​ మృతదేహంతో కార్మికులు ఆందోళనకు దిగారు. బస్​డిపో ముందు నిరసన చేపట్టారు. డిపోలోకి చొచ్చుకెళ్లేందుకు కార్మికులు యత్నించడంతో పోలీసులు అడ్డుకున్నారు. దీంతో కొద్దిసేపు డిపో వద్ద ఉద్రిక్త వాతావరణం నెలకొంది.

మహబూబాబాద్​ డిపో ముందు ఉద్రిక్తత చోటుచేసుకుంది. ఆత్మహత్యకు పాల్పడిన డ్రైవర్ నరేశ్​ మృతదేహంతో ప్రభుత్వ ఆసుపత్రి నుంచి బస్​డిపో వరకు ఆర్టీసీ కార్మికులు ర్యాలీ నిర్వహించారు. బస్​డిపోలోకి చొచ్చుపోయేందుకు ప్రయత్నించగా పోలీసులు అడ్డుకున్నారు. బారికేడ్లను ధ్వంసం చేసి లోపలికెళ్లేందుకు ప్రయత్నించిన కార్మికులకు పోలీసులకు మధ్య తోపులాట జరిగింది. ఘర్షణ వాతారణం ఏర్పడింది. అనంతరం మృతదేహంతో బస్​డిపో ముందు ఆర్టీసీ కార్మికులు, అఖిలపక్ష పార్టీల కార్యకర్తలు ధర్నా చేపట్టారు. ప్రభుత్వానికి వ్యతిరేకంగా నినాదాలు చేశారు. మృతుని కుటుంబానికి రూ.25 లక్షల పరిహారం, కుటుంబంలో ఒకరికి ఉద్యోగం ఇవ్వాలని... లేనిపక్షంలో శవపరీక్ష చేయనివ్వబోమని కార్మికులు భీష్మించుకున్నారు.

ఇవీ చూడండి: మహబూబాబాద్‌లో ఆర్టీసీ డ్రైవర్‌ ఆత్మహత్య