వీధి వ్యాపారులకు చెక్కులు పంపిణీ చేసిన ఎమ్మెల్యే

కరోనా వల్ల లాక్​డౌన్​ సమయంలో ఉపాధి కోల్పోయిన వీధి వ్యాపారులకు ప్రధానమంత్రి స్వనిధి పథకంలో భాగంగా మంజూరైన రుణాల చెక్కులను ఎమ్మెల్యే కోనేరు కోనప్ప పంపిణీ చేశారు. కాగజ్​ నగర్​ పురపాలక సంఘం కార్యాలయంలో లబ్ధిదారులకు చెక్కులు పంచిన ఎమ్మెల్యే కరోనా వ్యాప్తి నేపథ్యంలో ప్రజలందరూ జాగ్రత్తలు పాటించాలని సూచించారు.

కుమురం భీం అసిఫాబాద్​ జిల్లాలోని కాగజ్​ నగర్​ మున్సిపల్​ కార్యాలయంలో వీధి వ్యాపారులకు ఎమ్మెల్యే కోనేరు కోనప్ప చెక్కులు పంపిణీ చేశారు. ప్రధాన మంత్రి స్వనిధి పథకంలో భాగంగా మంజూరైన రుణాల చెక్కులను ఎమ్మెల్యే లబ్దిదారులకు అందించారు. లాక్​డౌన్​ వల్ల ఉపాధి కోల్పోయిన వీధి వ్యాపారులకు కేంద్ర ప్రభుత్వం చేయూతనిస్తూ.. రుణాలు మంజూరు చేసిన విషయం తెలిసిందే. ఈ మేరకు కాగజ్​ నగర్​ మున్సిపాలిటీ పరిధిలో 1600 మంది రుణాలకు దరఖాస్తు చేసుకోగా.. 282 మందికి రుణాలు మంజూరయ్యాయి. దరఖాస్తు చేసుకున్న ప్రతీ ఒక్కరికి త్వరలోనే రుణాలు మంజూరవుతాయని ఎమ్మెల్యే తెలిపారు. ఈ కార్యక్రమంలో పురపాలక ఛైర్మన్ సద్దాం హుస్సేన్, కమిషనర్ శ్రీనివాస్, మెప్మా అధికారులు, పలువురు కౌన్సిలర్లు, కో అప్షన్ సభ్యులు, బ్యాంక్ అధికారులు పాల్గొన్నారు.

ఇదీ చూడండి : పిల్లల అమ్మకాలకు ఏజెంట్​ వ్యవస్థ.. 'సృష్టి'oచిన ఆసుపత్రి