Cotton Farmers Problems Telangana 2023 : ప్రతికూల వాతావరణం.. పత్తి రైతులకు శాపం

Cotton Farmers Problems Telangana 2023 : వానాకాలం సీజన్ పత్తి రైతును కలవరపెడుతోంది. సీజన్ ఆరంభం నుంచి ఇప్పటి వరకు ఎదురవుతున్న ప్రతికూల వాతావరణంతో ఎదుగూ బొదుగూ లేని పత్తి పంట సాగుదారును ఆందోళనకు గురిచేస్తోంది. రూ.వేలకు వేలు పెట్టుబడులు పెట్టడంతో పాటు.. ప్రస్తుతం ఏపుగా పెరిగి కాత దశకు చేరాల్సిన సమయంలోనూ ఆశాజనకంగా లేని పైర్లను చూసి రైతులు బోరుమంటున్నారు. చూస్తూ చూస్తూ పంటను వదిలేయలేక అదనంగా పెట్టుబడులు పెట్టి మరీ.. పంటను కాపాడుకునేందుకు సర్వశక్తులొడ్డుతున్నారు. అయినప్పటికీ.. ఇటీవలి పరిస్థితులు దిగుబడులపై గణనీయమైన ప్రభావం చూపే అవకాశాలు ఉండటం పత్తి రైతుల్ని వేదనకు గురిచేస్తోంది.

Cotton Farmers Problems Telangana 2023 : ఏటికేడు నష్టాలు మూటగట్టుకుంటున్నా.. సాగును వదిలిపెట్టకుండా ముందుకెళ్తున్న పత్తి రైతుల్ని(Cotton Farmers in Khammam).. కష్టాలు వెంటాడుతూనే ఉన్నాయి. ప్రకృతి ప్రకోపం కర్షకులకు శాపంగా మారుతోంది. ఏపుగా పెరిగి కాత దశకు చేరుకోవాల్సిన సమయంలో.. ఎదుగూ బొదుగూ లేని పత్తి చేనును చూసి హలధారి బోరుమంటున్నాడు. పంటను వదిలేయలేక అదనపు పెట్టుబడులతో కాపాడుకునేందుకు సర్వశక్తులొడ్డుతున్నాడు. అయినప్పటికీ దిగుబడులు పెరిగే అవకాశం లేకపోవటం.. అన్నదాతల్ని మరింత కలవరపెడుతోంది.

Khammam Cotton Farmers Problems : ఖమ్మం జిల్లాలో లక్షా 79 వేల 287 ఎకరాల్లో, భద్రాద్రి కొత్తగూడెం జిల్లాలో లక్షా 99 వేల 720 ఎకరాల్లో రైతులు పత్తి పంటను సాగు చేశారు. ప్రస్తుత వానాకాలం సీజన్‌(Rainy Season)లో ఆరంభం నుంచే పత్తి రైతులకు పరీక్షే ఎదురవుతోంది. జూన్‌లో వర్షాలు ముఖాలు చాటేయటంతో రైతులు రెండు, మూడు సార్లు విత్తనాలు వేశారు. జులైలో అధిక వర్షాలు కురవటంతో మొలక దశలో ఉన్న పత్తికి తీవ్ర నష్టం వాటిల్లింది. ఆగస్టులో ఆశించిన వానలు లేక పత్తి పంట(Cotton Crop) ఎదుగుదల లేకుండా పోయింది. ఈ సమయానికి ఏపుగా పెరిగి కాయ దశకు చేరాల్సి ఉంది. మొక్క పెరుగుదల అనుకున్నట్లు లేకపోవటంతో రైతులు ఆందోళనకు గురవుతున్నారు.

Weather Conditions Troubling Cotton Farmers : వాతావరణ పరిస్థితులు, పత్తిలో ఎదుగుదల లేకపోవటం.. దిగుబడులపై తీవ్ర ప్రభావం చూపే అవకాశం ఉందని రైతులు ఆవేదన వ్యక్తం చేస్తున్నారు. ఉమ్మడి జిల్లాలో సగటు వర్షపాతం నమోదైనప్పటికీ.. సమయానుకూలంగా వానలు కురవక ఇబ్బందులు తప్పట్లేదు. సీజన్ ఆరంభం నుంచి ప్రతికూల వాతావరణం కారణంగా రైతులకు పెట్టుబడి భారం తడిసి మోపెడవుతోంది. కలుపుతీతతో పాటు పైర్ల ఎదుగుదల కోసం ఇబ్బడిముబ్బడిగా రసాయన మందులు(Chemical Drugs) పిచికారి చేయాల్సి వస్తుంది.

'గత నెల నుంచి వర్షం లేకపోవడంతో పత్తి పొలాల్లో ఎదుగుదల లేదు. నాలుగు రోజుల నుంచి వర్షం పడడంతో వాటికి కాస్త ప్రాణం పోసినట్లైంది. ఈ వర్షాల వల్లే కాస్త మందులు వేయడం జరుగుతుంది. ఈ ఏడాది పత్తి పొలాలు కాత దశలోనే బాగా దెబ్బతిన్నాయి. పెట్టుబడులు కూడా చాలా అవుతున్నాయి.' - పత్తి రైతు, ఖమ్మం జిల్లా

Problems of Cotton Farmers in Khammam : ఎకరా పత్తి సాగుకు రూ.15 వేల వరకు ఖర్చు చేయాల్సి ఉండగా ఇప్పుడు అదనపు భారం రైతుల మీద పడుతోంది. పురుగు మందులకు డిమాండ్‌ పెరగటంతో కంపెనీలు అధిక ధరలకు విక్రయిస్తున్నాయి. వచ్చే నెల నుంచి చలి తీవ్రత పెరిగే అవకాశం ఉండటంతో అన్నదాతల ఆందోళన అధికమౌతోంది. పంటను కాపాడుకునేందుకు వివిధ రకాల పురుగు మందులు పిచికారి చేసినా ఆశించినా ఫలితాలు కనిపించట్లేదు. పొటాషియం నైట్రేట్‌ లేదా 19-19-19 పది గ్రాములు.. లీటర్‌ నీటితో కలిపి పిచికారి చేస్తే పత్తిలో పెరుగుదల ఉంటుందని వ్యవసాయ శాస్త్రవేత్తలు సూచిస్తున్నారు.