NIA Raids in Karimnagar Today : కరీంనగర్‌లో NIA అధికారుల సోదాలు.. అతడి కోసం గాలింపు..!

NIA Raids in Karimnagar Today : కరీంనగర్‌లో ఎన్‌ఐఏ అధికారుల బృందం సోదాలు నిర్వహించింది. పట్టణానికి చెందిన ఓ వ్యక్తికి గతంలో పీఎఫ్‌ఐతో సంబంధాలు ఉన్నట్లు తేలడంతో అధికారులు అతడి ఇంట్లో తనిఖీలు చేశారు. ఎలాంటి అవాంఛనీయ ఘటనలు చోటుచేసుకోకుండా పోలీసులు భారీ బందోబస్తు ఏర్పాటు చేశారు.

NIA Raids in Karimnagar Today : కరీంనగర్‌లో నేషనల్ ఇన్వెస్టిగేషన్ ఏజెన్సీ (NIA) తనిఖీలు నిర్వహించింది. హైదరాబాద్ నుంచి వచ్చిన ఎన్ఐఏ అధికారుల బృందం.. ఏఆర్ పోలీసుల బందోబస్తు మధ్య సోదాలు చేపట్టింది. కరీంనగర్ హుస్సేనీపురకు చెందిన తబరేజ్‌ అనే వ్యక్తికి గతంలో పాపులర్ ఫ్రంట్ ఆఫ్ ఇండియా(PFI)తో సంబంధాలు ఉన్నాయని పోలీసులు గుర్తించారు. ఈ మేరకు ఎన్‌ఐఏ అధికారుల బృందం అతడి కుటుంబసభ్యులను విచారించింది. తెల్లవారుజామున 4 గంటలకే చేరుకున్న అధికారులు.. దాదాపు 3 గంటల పాటు ఇంట్లో తనిఖీలు నిర్వహించారు. ఇంజినీరింగ్ పూర్తి చేసిన తబరేజ్‌ ఎనిమిది నెలల క్రితమే ఉపాధి కోసం విదేశాలకు వెళ్లినట్లు సమాచారం.

Karimnagar NIA Raids : అయితే తబరేజ్‌ ఇంట్లో సోదాలు నిర్వహించేందుకు ఎన్ఐఏ అధికారుల బృందం ప్రత్యేకంగా కరీంనగర్‌కు చేరుకోవడం ప్రాధాన్యత సంతరించుకుంది. తెల్లవారుజామునే కరీంనగర్ చేరుకున్న ఎన్ఐఏ టీమ్.. అనుమానిత వ్యక్తి ఇంట్లో తనిఖీలు చేపట్టడం కలకలం సృష్టించింది. తనిఖీలు కొనసాగుతున్న ప్రాంతంలో పోలీసులు భారీ బందోబస్తు ఏర్పాటు చేశారు.

కీలక నేత అరెస్ట్‌..: దేశవ్యాప్తంగా సంచలనం సృష్టించిన పీఎఫ్​ఐ (పాపులర్‌ ఫ్రంట్‌ ఆఫ్‌ ఇండియా) కేసులో కీలకమైన వ్యక్తిని ఎన్​ఐఏ ఇటీవల అరెస్టు చేసింది. పీఎఫ్​ఐలో చేరిన వారికి ఆయుధ శిక్షణ ఇస్తున్న మహ్మద్​ యూనిస్​ అనే వ్యక్తిని అదుపులోకి తీసుకుంది. నిజామాబాద్​ టూ టౌన్​ పోలీస్​ స్టేషన్​లో నమోదైన ఈ కేసుతో పాటు గత ఏడాది నుంచి ఇప్పటి వరకు 16 మందిని ఎన్​ఐఏ అరెస్టు చేసింది. వీరిపై హైదరాబాద్​లోని ఎన్​ఐఏ కోర్టులో అభియోగ పత్రాలు దాఖలు చేసింది. వీరు ఇచ్చిన సమాచారం ఆధారంగా కీలక నిందితుడిని అరెస్టు చేశారు.

అమాయక ముస్లిం యువతను ప్రేరేపించి.. పీఎఫ్​ఐలో చేరిన వారికి మారణాయుధాలతో దాడులు చేయడం వంటి వాటిపై శిక్షణను ఇస్తున్నారు. అదే విధంగా భారతదేశాన్ని ఇస్లామిక్​ దేశంగా మార్చే విధంగా వారికి శిక్షణ మెలకువలు నేర్పుతుంటారు. పీఎఫ్​ఐలో చేరిన రెండు తెలుగు రాష్ట్రాలకు చెందిన వారికి ఆయుధాలు ఎలా వాడాలో.. తెలియజేసే ఆయుధ శిక్షకుడిగా మహ్మద్​ యూనిస్​ పని చేశాడు. ఈ పీఎఫ్​ఐ కేసును దర్యాప్తు చేస్తున్న ఎన్​ఐఏకి కీలకమైన నిందితుడు మహ్మద్​ యూనిస్​ పట్టుబడ్డాడు. నంద్యాలలో తన సోదరుడి ఇన్వర్టర్​ దుకాణంలో పని చేసిన యూనిస్​.. 2022 సెప్టెంబరులో సోదాలు చేసిన సమయంలో భార్యా పిల్లలతో పరారయ్యాడు.

PFI CASE In Telangana : ఇతని జాడ కోసం గాలిస్తున్న ఎన్​ఐఏకు.. ఆంధ్రప్రదేశ్​ నుంచి కర్ణాటకలోని బళ్లారికి పారిపోయినట్లు సమాచారం అందింది. అక్కడ కావ్​లా బజార్​లో ఉంటూ బషీర్​ అని పేరు మార్చుకుని.. నివసిస్తున్నట్లు తెలుసుకున్నారు. అక్కడి నుంచి ఉగ్రమూకలకు ప్రత్యేక కోడ్​ భాషలో సమాచారాన్ని చేరవేస్తున్నట్లు ఎన్​ఐఏ దర్యాప్తులో తేలింది. అక్కడ స్థానికంగా ప్లంబర్​గా జీవనం సాగిస్తున్నట్లు ఎన్​ఐఏకు పక్కా సమాచారం అందడంతో.. అక్కడకు వెళ్లిన కేంద్ర దర్యాప్తు సంస్థ యూనిస్​ను అరెస్టు చేసింది.