కామారెడ్డి జిల్లా కేంద్రంలోని కాంగ్రెస్ పార్టీ కార్యాలయంలో మాజీ మంత్రి షబ్బీర్ అలీ మీడియా సమావేశం నిర్వహించారు. నిన్న జరిగిన ముఖ్యమంత్రి మీడియా సమావేశంలో ప్రజలకు సందేశాన్ని ఇస్తారని ఆశించామని.. కానీ పిట్టల దొర మాదిరిగా కహానీ చెప్పారన్నారు. ప్రతిపక్షం అయినా కరోనా సమయంలో ప్రధాని, సీఎం మాటలకు విలువ ఇచ్చి లాక్డౌన్ నిబంధనలు పాటించామ‌న్నారు. ప్రభుత్వాన్ని బదనాం చేసేలా మేమెప్పుడు మాట్లాడలేదని.. కానీ సీఎం మాత్రం కాంగ్రెస్ పార్టీపై అనేక విమర్శలు చేశార‌న్నారు.
ఛత్తీస్ఘడ్ రాష్ట్ర మంత్రితో మాట్లాడటం జరిగిందని.. 11 వేల కోట్ల రూపాయల రుణమాఫీతో పాటు క్వింటాల్ ధాన్యం రూ.2500 కొంటున్నట్లు మంత్రి చెప్పారని తెలిపారు. మీ బృందంతో కలిసి ఛత్తీస్ఘడ్ రావాలని ఛాలెంజ్ చేశారు. యూత్ కాంగ్రెస్లో ఉన్నప్పుడు పాస్పోర్టు దందా చేసింది నిజం కాదా అని ప్రశ్నించారు. ముఖ్యమంత్రి హోదాలో హుందాగా మాట్లాడితే బాగుంటుందని సూచించారు. కరోనా సమయంలో మీ నాయకులు ఎక్కడున్నారని ప్రశ్నించారు.
