ఆరో యూనిట్ ప్యానల్ బోర్డ్ నుంచి వచ్చిన మంటలతోనే శ్రీశైలం జల విద్యుత్ కేంద్రంలో మంటలు వ్యాపించి ఉంటాయని ట్రాన్స్కో, జెన్కో సీఎండీ ప్రభాకరరావు ప్రాథమిక నిర్ధరణకు వచ్చారు. 4వ యూనిట్లో భారీగా నష్టం సంభవించిందని... ఇప్పట్లో అది అందుబాటుకోకి వచ్చే పరిస్థితి లేదన్నారు. శ్రీశైలం జల విద్యుత్ కేంద్ర ప్రమాద స్థలాన్ని పరిశీలించారు. శ్రీశైలం భూగర్భ విద్యుత్ కేంద్రంలోని సర్వీస్ బే, 6 యూనిట్ల జనరేటర్లు, కంట్రోల్ ప్యానెల్స్, ట్రాన్స్ ఫార్మర్లు, ఇండోర్ గ్యాస్ సబ్ స్టేషన్, మెయిన్ కంట్రోల్ రూమ్ల్లో తిరిగారు.
అందరూ అనుకున్నట్లు ప్రమాదం వల్ల వేల కోట్ల నష్టం వాటిళ్లలేదని స్పష్టం చేశారు. సుమారు వంద కోట్ల లోపే నష్టం సంభవించి ఉంటుందని అంచనా వేశారు. 6వ యూనిట్లో ప్యానల్ పూర్తిగా దగ్ధమైందని తెలిపారు. 1,2 యూనిట్లను సెప్టెంబర్ 15 లోపు అందుబాటులోకి తీసుకొస్తామన్నారు. ప్రమాదంలో మరణించిన వారి కుటుంబాలను ఆదుకోవడానికి ముఖ్యమంత్రి కేసీఆర్ సిద్ధంగా ఉన్నారని తెలిపారు. వారిని ఎలా ఆదుకోవాలనే విషయాన్ని చాలా తీవ్రంగా పరిశీలిస్తున్నామన్నారు.
