జోగులాంబ గద్వాల జిల్లా అలంపూర్లో భాజపా జాతీయ ఉపాధ్యక్షురాలు డీకే అరుణ.. ఎమ్మెల్సీ అభ్యర్థి రామచంద్రరావుతో కలిసి జోగులాంబ బాలబ్రహ్మేశ్వర స్వామి వారిని దర్శించుకున్నారు. అనంతరం నామినేషన్ పత్రాలకు ప్రత్యేక పూజలు చేశారు. ఉమ్మడి మహబూబ్ నగర్, రంగారెడ్డి, హైదరాబాద్ పట్టభద్రుల స్థానానికి ఎమ్మెల్సీ అభ్యర్థిగా పోటీ చేస్తున్న రామచంద్రరావును భారీ మెజార్టీతో గెలిపించాలని డీకే అరుణ కోరారు.
ఇది తెరాస హత్యే..
రాష్ట్రంలో సంచలనంగా మారిన న్యాయవాద దంపతుల హత్యను రాజకీయ హత్య కాకుండా రాష్ట్ర ప్రభుత్వం చేసిన హత్యగా తాము భావిస్తున్నట్లు అరుణ పేర్కొన్నారు. తెరాస మాజీ ఎమ్మెల్యే, జడ్పీ ఛైర్పర్సన్ పుట్ట మధు మేనల్లుడి అరెస్టుతో ఆ విషయం తేటతెల్లమైందని వెల్లడించారు. ప్రభుత్వంపైనా తమకు నమ్మకం లేదని.. ఈ హత్య వెనుక ఎవరెవరి ప్రమేయం ఉందో తెలియాలంటే కేసు దర్యాప్తును సీబీఐకి అప్పగించాలని కోరారు.
రాష్ట్రంలో న్యాయం కోసం పోరాడిన వారిని తెరాస నాయకులు దుర్మార్గంగా నడిరోడ్డుపై హత్యలు చేస్తున్నారని అరుణ ఆగ్రహం వ్యక్తం చేశారు. ఇవి వ్యక్తిగత హత్యలు కావని భూ కబ్జాలకు ఎదురు తిరిగినందుకే చంపేశారని ఆరోపించారు. న్యాయవ్యవస్థకే రక్షణ లేకపోతే సామాన్యుల పరిస్థితి ఏంటని ప్రశ్నించారు.
ఇదీ చదవండి: న్యాయవాదుల హత్యతో సంబంధం లేదు: పుట్ట మధు
