ఏపీలో రెండో అతిపెద్ద దేవాలయంగా భాసిల్లుతున్న విజయవాడ శ్రీ దుర్గామల్లేశ్వర స్వామి దేవస్థానం స్థిరాస్తులు కనుమరుగవుతున్నాయి. ఆలయానికి దాతలు, దత్త దేవాలయాల ద్వారా సంక్రమించిన 243 ఎకరాల భూములు... కృష్ణా, గుంటూరు జిల్లాల్లో ఉన్నాయి. వీటికి ఏడాదికి రూ.50 లక్షలకు మించి కౌలు రావడం లేదు. నామమాత్రపు లీజులతో అయిన వారికి కట్టబెడుతుండటమే ఇందుకు కారణం. పైగా కొన్నింటి కౌలుకు ఎవరూ ఆసక్తి చూపడం లేదంటూ ఖాళీగానే ఉంచుతూ ఆలయ ఆదాయానికి గండి కొడుతున్నారు. భూములు ఆక్రమణలకు గురవుతున్నా అధికారులు చూసీ చూడనట్లు ఉంటున్నారు. దుర్గగుడికి సంబంధించిన ఆస్తుల రిజిస్టరును 2010 నుంచి అప్‌డేట్‌ చేయలేదు. గత పాలకవర్గం దుర్గగుడి భూములపై రీసర్వే చేసి పట్టాలు ఇప్పించాలని జిల్లా కలెక్టర్‌ను కోరినా.... ఇప్పటివరకు సర్వే జరగలేదు.
కౌలు లీజుల్లో అక్రమాలు
భూములను కౌలుకు ఇచ్చే ప్రక్రియలో అక్రమాలు జరగడం వల్ల ఏటా వేలం నిర్వహించి లీజులకు ఇస్తున్నారు. గ్రామాల్లో టముకు వేయించి వేలంలో ఎవరు ఎక్కువ ఇవ్వడానికి ముందుకు వస్తే వారికి భూములను అప్పగించాల్సి ఉండగా.... కానీ నామమాత్రపు లీజుకు ఇస్తూ అవినీతికి పాల్పడుతున్నట్లు అ.ని.శా. గుర్తించింది. ఆస్తులు, భూముల వేలానికి సంబంధించిన 43 రిజిస్టరు, 8ఏ రిజిస్టరులో పలు లోపాలను గుర్తించింది. ఆడిట్‌ అభ్యంతరాలున్నా వాటికి స్పష్టత, వివరణలు ఇవ్వలేదు. దానివల్ల ఈ విభాగానికి చెందిన సూపరింటెండెంట్, ఉద్యోగులను సస్పెండ్ చేయాలని దేవాదాయశాఖ కమిషనర్‌ ఆదేశించారు.
సేద్యం పేరిట మురుగు నింపేశారు
కృష్ణా జిల్లాలోని కంకిపాడు మండలం పునాదిపాడులో 7.86 ఎకరాల పొలముంది. కొన్నేళ్లుగా దీన్ని ఎవరూ సేద్యం చేయడం లేదు. దస్త్రాల్లో మాత్రం ఏటా సాగు చేస్తున్నట్లు ఉంటుంది. నామమాత్రపు కౌలు చెల్లించినట్లు ఉంటుంది. ఈ పొలం పక్కనే ఓ కార్పొరేట్‌ విద్యా సంస్థ నుంచి వచ్చే మురుగు నీరంతా ఇక్కడే నిలుస్తోంది. కార్పొరేట్‌ సంస్థ అధిక మొత్తంలో కౌలు చెల్లిస్తే దానిలో కొంతమేరకే దుర్గగుడికి చెల్లిస్తున్నట్లు ఆరోపణలున్నాయి. పాతపాడు పరిధిలోనూ 5.89 ఎకరాల భూమి రెండేళ్ల నుంచి ఖాళీగా ఉంటోంది. కంకిపాడు మండలం గోశాల, ఈడుపుగల్లు గ్రామాల్లోని దత్త దేవాలయాల భూముల కౌలుకు లెక్క లేకుండా పోయింది.
వేణుగోపాల స్వామి ఆస్తికి ఎసరు
కవులూరులో సంతాన వేణుగోపాలస్వామి దేవాలయానికి చెందిన 29 ఎకరాల భూమిని కొందరు సొంతం చేసుకునే ప్రయత్నాల్లో ఉన్నారు. న్యాయస్థానంలో కౌంటర్‌ వేయకుండా వారికి కొందరు అధికారులు సహకరిస్తున్నట్లు తెలిసింది. సర్వే నంబరు 273లో 17 ఎకరాలు, 376లో 23.60 ఎకరాలు, 460లో 8.37 ఎకరాలు ఉంది. నామమాత్రంగా కూడా కౌలు ఇవ్వడం లేదని తెలిసింది. మరో 15 ఎకరాల భూమి ఇప్పటికే చేతులు మారగా....దానిపై రైతులు హక్కులు పొందినట్లు సమాచారం.
రూ.1.35 లక్షలు వద్దంట...రూ.70వేలు చాలంట!
విజయవాడ గ్రామీణ మండలం ప్రసాదంపాడులో దుర్గగుడికి 4.61 ఎకరాల పంట భూమికి ఏడాదికి వచ్చే కౌలు 70 వేలు మాత్రమే. 2019లో చేసుకున్న ఈ ఒప్పందం 2022 వరకు కొనసాగనుండటం గమనార్హం. సాధారణంగా డెల్టా ప్రాంతంలో రెండు పంటలకు కలిపి ఎకరాకు ఏడాదికి 22 బస్తాల ధాన్యం తీసుకుంటారు. ధాన్యం ధరకు అనుగుణంగా లెక్కిస్తే కనీసం 30వేల చొప్పున 4.61 ఎకరాలకు దాదాపు 1.35 లక్షల వరకు కౌలు రావాలి. రామవరప్పాడు పరిధిలో సర్వే నంబరు 86లో ఉన్న 8.71 ఎకరాల భూమికి రెండేళ్లుగా ఒక్కపైసా కౌలు రావడంలేదు. గుంటూరుకు చెందిన వ్యక్తి 7 లక్షలకు వేలం పాడారు. అటు డబ్బులు చెల్లించక... ఇటు సాగు చేయకపోయినా.. దేవస్థానం పట్టించుకోలేదు. విజయవాడ విద్యాధరపురంలో సర్వే నంబరు 106లో 5 ఎకరాల భూమి ఉన్నట్లు దస్త్రాల్లో కనిపిస్తోంది. దేవస్థానం ప్రకటించిన ఆస్తుల జాబితాలోనూ ఉన్నా... ఆదాయం మాత్రం లేదు. ఇప్పటికే కొన్ని ఆక్రమణలు జరిగినట్లు తెలుస్తుండగా.... మిగిలిన దానిలో దేవస్థానం పూల మొక్కలను పెంచుతోంది.
గొల్లపూడిలో 1.96 ఎకరాలు మాయం
గొల్లపూడిలో పట్టాభిరామాలయం ద్వారా దుర్గగుడికి సంక్రమించిన కోట్ల విలువైన 1.96 ఎకరాల భూమి ప్రస్తుతం మాయమైంది. విజయవాడ నగర పరిధిలోని అజిత్‌సింగ్‌ నగర్‌లో ఉన్న 1.98 ఎకరాల భూమి.... దశాబ్దాలుగా ఖాళీగా ఉండటంతో కొందరు ఆక్రమించుకుంటున్నారు. అమ్మవారికి చెందిన మొగల్రాజపురంలోని 8.22 ఎకరాలను, పటమటలోని 5.95 ఎకరాలను ఓ విద్యాసంస్థకు ఉదారంగా ఇచ్చారు.
ఇదీ చదవండి: రేపు యాదాద్రిలో పర్యటించనున్న సీఎం కేసీఆర్‌
