గోడు వినకుండా.. పొట్ట కొట్టారు..!

ముందస్తు సమాచారం లేకుండా.. ప్రత్యామ్నాయం చూపకుండా లింగంపల్లి మార్కెట్​ను కూల్చివేశారని వ్యాపారులు ఆవేదన వ్యక్తం చేశారు. ఏ ఆపద వచ్చిన ఆదుకుంటామని హామీ ఇచ్చిన నాయకుల జాడలేదని.. రేపటి నుంచి ఏం చేయాలో తోచని పరిస్థితి నెలకొందని ఆవేదన వ్యక్తం చేశారు. వ్యాపారులకు ముందుగానే సమాచారం ఇచ్చామని.. మార్కెట్​ శిథిలావస్థకు చేరుకోవడం వల్లనే కూల్చివేస్తున్నట్లు అధికారులు తెలిపారు.

సమాచారం లేకుండా మార్కెట్​ను కూల్చేస్తారా.. మేం ఎట్లా బతకాలి.. రేపటి నుంచి రోడ్డు మీద కూర్చోవాలా.. తమ ఆస్తి నష్టానికి ఎవరు బాధ్యులు.. నాయకులు ఎక్కడికి పోయారు.. మాకు నష్టం జరిగాక ఈ ప్రభుత్వం ఎందుకు... ఇవన్ని ప్రశ్నలు కాదు.. లింగంపల్లి మార్కెట్​ కూల్చివేతతో బాధితులుగా మారిన వ్యాపారుల ఆర్తనాదాలు.

హైదరాబాద్​లోని లింగంపల్లి మార్కెట్​ను.. జీహెచ్​ఎంసీ అధికారులు ఇవాళ కూల్చివేశారు. మందస్తు సమాచారం లేకుండా కూల్చివేస్తున్నారంటూ వ్యాపారులు ఆందోళకు దిగారు. భారీ బందోబస్తు ఏర్పాటుచేసి నిర్మాణాలను తొలగిస్తున్నారు.

నారాయణగూడ చౌరస్తాలోని లింగంపల్లిలో దాదాపు 70 ఏళ్ల క్రితం నాటి జనాభాకు అనుగుణంగా.. మున్సిపల్​ మార్కెట్​లో సుమారు 50 దుకాణాలను నిర్మించారు. అప్పటి నుంచి పెరుగుతున్న జనాభాకు అనుగుణంగా నారాయణగూడ రహదారిని పలుమార్లు విస్తరించారు. ఆ సమయంలో మార్కెట్​ను స్వల్పంగా కూల్చి.. చిన్న దుకాణాలను నిర్మించి వ్యాపారులకు ఇచ్చారు.

షాపులు చిన్నగా ఉన్నా.. జీవనాధారం పోగొట్టుకోలేక వాటిలోనే వ్యాపారాలు చేసుకున్నాం. గతంలో కూల్చివేతల సమయంలో మందస్తు సమాచారం ఇచ్చారు. ప్రస్తుతం ఎవరికీ చెప్పకుండా నిర్మాణాలు తొలగిస్తున్నారు. డెబ్బై ఏళ్లుగా ఈ మార్కెట్​నే నమ్ముకుని జీవనం సాగిస్తున్నాం. ఎలాంటి హామీ ఇవ్వకుండా, ప్రత్యామ్నాయం చూపకుండా షాపులను కూల్చివేయడం ఎంతవరకు సమంజసం.

-బాధితులు

నాయకులెక్కడ...

ఏ సమస్య వచ్చిన ఆదుకుంటామని ఎన్నికల మందు హంగామా చేసిన నాయకులు కనిపించడం లేదని వ్యాపారులు ఆవేదన వ్యక్తం చేశారు. తమ జీవితాలు రోడ్డున పడ్డా.. ఏ ఒక్కరూ అండగా నిలిచేందుకు రాలేదని వాపోయారు. కొత్తగా నిర్మించతలపెట్టిన మార్కెట్​లో ప్రస్తుత వ్యాపారులందరికీ దుకాణాలు కేటాయించాలని కోరారు.

మార్కెట్​ కూల్చివేతతో రోడ్డున పడ్డామని.. రేపటి నుంచి రహదారిపైన కూర్చొని వ్యాపారులు చేసుకోవాలా అంటూ పలువురు మహిళలు ఆవేదన వ్యక్తం చేశారు. ముందస్తు సమాచారం ఇవ్వకుండా కూల్చివేయడం వల్ల చాలా ఆస్తినష్టం జరిగిందని వాపోయారు.

సిబ్బంది ముసుగులో..

ఓ వైపు మార్కెట్​లో నిర్మాణాలు తొలగింపు పనులు కొనసాగుతుండగా.. పురపాలక సిబ్బంది ముసుగులో కొందరు ఇనుప చువ్వలు, ఇనుప దూలాలు, ఇతర సామగ్రి తీసుకెళ్తున్నారు. జీహెచ్​ఎంసీ టౌన్​ ప్లానింగ్​, ఇంజినీరింగ్​ అధికారులు అక్కడే ఉన్నా.. పట్టించుకోవడం లేదని వ్యాపారులు ఆరోపిస్తున్నారు.

మోడల్‌ మార్కెట్‌...

నారాయణగూడ చౌరస్తాలోని లింగంపల్లి మున్సిపల్‌ మార్కెట్‌ శిథిలావస్థకు చేరిందని జీహెచ్​ఎంసీ అధికారి వరప్రసాద్​ తెలిపారు. నూతన నిర్మాణంలో భాగంగా సెల్లార్​తో పాటు నాలుగు అంతస్థుల షాపింగ్‌ కాంప్లెక్స్‌ నిర్మించనున్నట్టు వెల్లడించారు. మార్కెట్​లో ఉన్న అందరు వ్యాపారులకు ముందస్తు సమాచారం ఇచ్చామన్నారు. మార్కెట్‌ భవనం శిథిలావస్థకు చేరిన దృష్ట్యా కూల్చి వేస్తున్నట్టు ఆయన వివరించారు.

ఇవీచూడండి: బందోబస్తు మధ్య లింగంపల్లి మార్కెట్​ కూల్చివేత