తెలుగుదేశం పార్టీ నేత వంగవీటి రాధ... జనసేన అధినేత పవన్ కల్యాణ్‌తో భేటీకానున్నారు. తూర్పు గోదావరి జిల్లాలోని దిండి రిసార్టులో జనసేన పీఏసీ సమావేశం జరగనుంది. ఈ సందర్భంగా దిండి రిసార్ట్‌కు పవన్ కల్యాణ్‌ వస్తున్నారు. ఇప్పటికే... వంగవీటి రాధ రిసార్ట్‌కు చేరుకున్నారు. పీఏసీ ఛైర్మన్ నాదెండ్ల మనోహర్‌తో ఆయన భేటీ అయ్యారు.
పవన్ కల్యాణ్‌కు ఘనస్వాగతం...
తూర్పుగోదావరి జిల్లా పి.గన్నవరం మండలం జి.పెదపూడి వద్ద పవన్ కల్యాణ్‌కు ఘనస్వాగతం పవన్ కల్యాణ్‌కు కార్యకర్తలు, అభిమానులు ఘన స్వాగతం పలికారు. అభివాదం చేసుకుంటూ... మల్కిపురం మండలం దిండికి సాగారు. దిండి రిసార్ట్‌లో పార్టీ రాజకీయ వ్యవహారాలపై మేధోమథనం జరపనున్నారు. రాత్రి అక్కడే బస చేయనున్న పవన్... శుక్రవారం అంతర్వేది లక్ష్మీనరసింహస్వామిని దర్శించుకుంటారు.
జన సైనికుల సన్నద్ధం...
వైకాపా ప్రభుత్వ వంద రోజుల పరిపాలన తర్వాత ప్రజా సమస్యలపై జనసేన మరింత విస్తృతంగా పోరాటం చేయనుందని ఆ పార్టీ రాజకీయ వ్యవహారాల కమిటీ సభ్యుడు కందుల దుర్గేష్ వెల్లడించారు. తూర్పు గోదావరి జిల్లా రాజోలు నియోజకవర్గం దిండిలో జరుగుతున్న జనసేన పీఏసీ సమావేశం... జన సైనికులను సన్నద్ధం చేస్తుందని తెలిపారు. 2 రోజుల సమావేశాన్ని పీఏసీ ఛైర్మన్ నాదెండ్ల మనోహర్ పర్యవేక్షిస్తున్నారు.
ఇదీ చదవండీ...మెగాస్టార్ గురించి ఆయన ఉపాధ్యాయుడు ఏమన్నారంటే..?
