Nirmala Sitharaman Fires On Telangana Government: కేంద్ర ఆర్థికమంత్రి నిర్మలా సీతారామన్ తెరాస ప్రభుత్వంపై ఆగ్రహం వ్యక్తం చేశారు. ధనిక రాష్ట్రాన్ని అప్పుల తెలంగాణగా మార్చారని ధ్వజమెత్తారు. తెరాస హయాంలో తెలంగాణకు రూ.3 లక్షల కోట్లకుపైగా అప్పులు చేసి ప్రజలపై భారం మోపారని విమర్శించారు. కాళేశ్వరం ప్రాజెక్టుకు రూ.లక్షల కోట్లు ఖర్చు చేస్తే చుక్క నీరూ రాలేదని నిర్మలా సీతారామన్ దుయ్యబట్టారు.
తెరాస సర్కారు నీళ్లు, నిధులు, నియామకాలు కల్పించడంలో పూర్తిగా విఫలమయ్యారని నిర్మలా సీతారామన్ మండిపడ్డారు. రాష్ట్ర ప్రజలు కష్టాల్లో ఉన్నారన్నారు. సీఎం కేసీఆర్ మంత్రాలు, తంత్రాలు అనే నెపంతో సచివాలయానికి వెళ్లలేదని ఆమె విమర్శించారు. తెలంగాణను అభివృద్ధి చేయని కేసీఆర్.. దేశాన్ని అభివృద్ధి చేస్తానంటే ప్రజలు నమ్మే పరిస్థితిలో లేరన్నారు.
ప్రత్యేక తెలంగాణ సెంటిమెంట్తో తెరాస ఆవిర్భవించిందన్న ఆమె.. నీళ్లు, నిధులు, నియామకాలు అనే మూడు నినాదాలతో తెరాస ప్రజల ముందుకు వెళ్లిందని గుర్తు చేశారు. కుల రహిత సమాజం నిర్మించడమే తెరాస లక్ష్యం అన్నారని పేర్కొన్నారు. కానీ 2014 నుంచి 2018 వరకు మంత్రి వర్గంలో మహిళలకు చోటు కల్పించలేదని నిర్మలా సీతారామన్ ఆరోపించారు.
రెండోసారి అధికారంలోకి వచ్చాక తొలుత మహిళలకు మంత్రివర్గంలో చోటు దక్కలేదని.. ప్రతి పక్షాలు, మీడియా ప్రశ్నించడంతో మహిళలకు మంత్రి వర్గంలో చోటు దక్కిందని తెలిపారు. నియామకాలన్న కేసీఆర్.. రాష్ట్రంలో ఎందుకు ఉద్యోగాల భర్తీ జరపట్లేదని నిర్మలా సీతారామన్ ప్రశ్నించారు. తెరాస సర్కారు నీళ్లు, నిధులు, నియామకాలు కల్పించడంలో పూర్తిగా విఫలమైందని విమర్శించారు.
"నీళ్లు, నిధులు, నియామకాలు మూడు వాగ్దానాలలో తెరాస పూర్తిగా విఫలమైంది. ఇప్పుడు భారత రాష్ట్ర సమితి. ఇవన్ని చూస్తే సెక్రటేరియేట్కు వెళ్లని కేసీఆర్ మంత్రాలు తంత్రాలు అనే నెపంతో సచివాలయానికి వెళ్లలేదు. కొత్త సచివాలయం కట్టుకుంటామని అన్నారు. తెలంగాణ ప్రజలు కష్టాల్లో ఉన్నారు. ఇప్పుడు తెరాస దేశానికి ఏం చేస్తుందో అనుమానస్పదంగా ఉంది. తెలంగాణను అభివృద్ధి చేయని కేసీఆర్.. దేశాన్ని అభివృద్ధి చేస్తానంటే ప్రజలు నమ్మే పరిస్థితిలో లేరు." - నిర్మలా సీతారామన్ కేంద్ర ఆర్థిక మంత్రి
ఇవీ చదవండి: 'మునుగోడులో తెరాస గెలవాలని సీఎం కేసీఆర్ క్షుద్రపూజలు చేయిస్తున్నారు'
హైవే మధ్యలో రాయి.. పూజిస్తే చాలు.. మోకాళ్లు, కీళ్ల నొప్పులు మాయం!
