political leaders support for realtors : రాజకీయ ఒత్తిడితో అక్రమ నిర్మాణాల గుర్తింపు వ్యవహారం పక్కదారి పడుతోంది. కొందరు ప్రజాప్రతినిధుల అండతో సాగుతున్న అక్రమ నిర్మాణాలను జాబితాలో చూపకుండా మాయాజాలం చోటు చేసుకుంటోంది. హెచ్‌ఎండీఏ పరిధిలోకి వచ్చే 29 పురపాలక సంఘాలు, ఏడు నగర పాలక సంస్థల పరిధిలో పంచాయతీల పేరుతో అక్రమ అనుమతుల నిర్మాణాలను ఈ నెలాఖరులోగా గుర్తించి నివేదికను పంపించాలని రాష్ట్ర పురపాలక శాఖ ప్రత్యేక ప్రధాన కార్యదర్శి అర్వింద్‌ కుమార్‌ కొద్ది రోజుల కిందట ఆదేశించారు. ఈ నేపథ్యంలో అన్ని పురపాలక సంఘాల, నగర పాలక సంస్థల కమిషనర్లు పూర్తి స్థాయిలో పరిశీలన మొదలుపెట్టారు. ఇది మొదలై రెండు రోజులు కాకముందే ప్రజాప్రతినిధులు ఫోన్లు చేసి ఫలానా వెంచర్లు జాబితాలో చూపించవద్దని ఒత్తిడి తెస్తున్నట్లు సమాచారం. ఈ వ్యవహారం ఇప్పుడు చర్చనీయాంశమైంది.
మంత్రి కేటీఆర్ స్పెషల్ ఫోకస్
illegal constructions in HMDA: హెచ్‌ఎండీఏ పరిధిలో ఇటీవల కాలంలో భారీ ఎత్తున అక్రమ నిర్మాణాలు మొదలయ్యాయి. రెండేళ్ల కిందటే పంచాయతీల నుంచి అనుమతులు తీసుకున్నట్లు తప్పుడు పత్రాలు చూపించి బహుళ అంతస్తుల అపార్టుమెంట్లు, విల్లాలు వేల సంఖ్యలో నిర్మిస్తున్నారు. దుండిగల్‌ పురపాలిక పరిధిలో అనేక అక్రమ నిర్మాణాలను ‘ఈనాడు-ఈటీవీ భారత్’ వెలుగులోకి తేవడంతో రాష్ట్ర పురపాలక శాఖ మంత్రి కేటీఆర్ కిందిస్థాయి అధికారుల తీరుపై ఆగ్రహం వ్యక్తంచేశారు. ఇక ముందైనా నగరంతోపాటు చుట్టపక్కల పట్ణణాలన్నీ ప్రణాళికా బద్ధంగా నిర్మాణాలు చేపట్టడం ద్వారా సమగ్ర అభివృద్ధి చేయాలని ముఖ్యమంత్రి కేసీఆర్‌ గతంలో అధికారులకు స్పష్టం చేశారు. ఈ నేపథ్యంలో దీనిపై కేటీఆర్ దృష్టిసారించారు.
అక్రమ నిర్మాణాలకు చెక్
అర్వింద్‌కుమార్‌ ఆదేశాలతో నాలుగైదు రోజులుగా అధికారులు అంతటా అక్రమ నిర్మాణాలు గుర్తించే పనిని మొదలుపెట్టారు. వివిధ పురపాలికల్లో అక్రమ నిర్మాణాల చెంతకు ప్రణాళికా విభాగం అధికారులు వెళ్లగానే కీలక ప్రజాప్రతినిధులకు సమాచారం చేరుతోంది. వెంటనే కమిషనర్‌కు ఫోన్‌ చేసి, ‘ఫలానా ప్రాంతంలో నిర్మాణాలు మాకు చెందిన వ్యక్తివే.. ప్రభుత్వానికి ఇచ్చే జాబితాలో ఆవెంచర్‌ పేర్లు పెట్టొద్దు’ అని చెబుతున్నారు. మాట కాదని నివేదికలో పెడితే బదిలీ తప్పదని హెచ్చరిస్తున్నారు. దీంతో కొందరు కమిషనర్లు నామ మాత్రంగా నివేదికలు ఇవ్వడానికి సిద్ధమవుతున్నట్లు చెబుతున్నారు.
ఇదీ చదవండి: Suicide Attempt: ప్రియుడితో కలిసి విషం తాగిన వివాహిత.. పరిస్థితి విషమం
