Telangana Assembly Sessions 2023 : నేటితో ముగియనున్న అసెంబ్లీ సమావేశాలు.. సభలో సుదీర్ఘంగా ప్రసంగించనున్న సీఎం కేసీఆర్

Telangana Assembly Sessions 2023 : తెలంగాణ అసెంబ్లీ సమావేశాలు నేటితో ముగియనున్నాయి. శనివారం ఐదు బిల్లులకు ఆమోదం తెలిపిన ప్రభుత్వం.. నేడు తెలంగాణ ప్రగతిపై చర్చలు జరిపే అవకాశం ఉంది. ముఖ్యంగా ముఖ్యమంత్రి కేసీఆర్​​ సుదీర్ఘంగా నేడు సభలో ప్రసంగించనున్నారు.

Telangana Assembly MonSoon Sessions 2023 : అసెంబ్లీ వర్షాకాల సమావేశాలు నేటితో ముగియనున్నాయి. తెలంగాణ రాష్ట్ర ఆవిర్భావం-సొంత రాష్ట్రంలో సాధించిన ప్రగతిపై ఇవాళ శాసనసభ, మండలిలో స్వల్పకాలిక చర్చ జరగనుంది. ఎన్నికల ముందు దాదాపుగా చివరి భేటీ కావడంతో ముఖ్యమంత్రి కేసీఆర్ సుదీర్ఘంగా ప్రసంగించనున్నారు. ఆర్టీసీ బిల్లు విషయంలో గవర్నర్ తీసుకునే నిర్ణయాన్ని బట్టి తదుపరి పరిణామాలు మారనున్నాయి.

గురువారం ప్రారంభమైన శాసనసభ వర్షాకాల సమావేశాలు నేటితో ముగియనున్నాయి. సమావేశాల్లో చివరి రోజైన ఇవాళ తెలంగాణ రాష్ట్ర ఆవిర్భావం-సొంత రాష్ట్రంలో సాధించిన ప్రగతి అంశంపై స్వల్పకాలిక చర్చ జరగనుంది. కాగా శనివారం సభలో 5 బిల్లులకు ఆమోదం తెలిపారు. తెలంగాణ ఇన్​స్టిట్యూట్​ ఆఫ్​ మెడికల్​ సైన్సెస్​, కర్మాగారాలు, మైనారిటీ కమిషన్​, జీఎస్టీ, పంచాయతీరాజ్ బిల్లులను ఆమోదించారు.

ఏడాది చివర్లో ఎన్నికలు..: ఈ ఏడాది నవంబర్ లేదా డిసెంబర్‌లో రాష్ట్ర అసెంబ్లీకి ఎన్నికలు జరగనున్నాయి. దీంతో ఎన్నికలకు ముందు ఈ సమావేశాలను చివరి సమావేశాలుగా పరిగణిస్తున్నారు. అందులో భాగంగానే ఇవాళ స్వల్పకాలిక చర్చ అంశాన్ని ఖరారు చేసి అజెండాలో పొందుపరిచారు. రాష్ట్ర ఆవిర్భావం మొదలు అధికారంలో ఉన్న కేసీఆర్ సర్కార్.. తమ హయాంలోని అభివృద్ధి, సంక్షేమ కార్యక్రమాలు, రాష్ట్ర పురోగతిని శాసనసభ వేదికగా ప్రజలందరికీ వివరించేలా వ్యూహం సిద్ధం చేసింది. స్వల్ప కాలిక చర్చకు ముఖ్యమంత్రి కేసీఆర్ సమాధానం ఇవ్వనున్నారు. సీఎం ప్రసంగం సుదీర్ఘంగా సాగనుంది. 2014 జూన్ రెండో తేదీ నుంచి తెలంగాణ ప్రగతి ప్రస్థానం, సాధించిన విజయాలు, భవిష్యత్ కార్యాచరణను కేసీఆర్ ఆవిష్కరించనున్నారు. కొన్ని కీలక నిర్ణయాలను కూడా ప్రకటించే అవకాశం ఉందని అంటున్నారు.

ప్రశ్నోత్తరాలు రద్దు..: శాసనసభ, మండలిలో ఇవాళ ప్రశ్నోత్తరాలు రద్దు చేశారు. నేరుగా స్వల్పకాలిక చర్చ చేపడతారు. నిన్న అసెంబ్లీ ఆమోదించిన ఐదు బిల్లులపై ఇవాళ మండలిలో చర్చ జరగనుంది. 2022 మార్చితో ముగిసిన సంవత్సరానికి ఫైనాన్స్ అకౌంట్స్, అప్రొప్రియేషన్ అకౌంట్స్‌పై కంప్ట్రోలర్ అండ్ ఆడిటర్ జనరల్ (కాగ్) నివేదికను ఆర్థికమంత్రి హరీశ్ రావు ఉభయసభల్లో ప్రవేశపెడతారు. ఆర్టీసీ ఉద్యోగులను ప్రభుత్వంలో విలీనం చేసే బిల్లు కోసం ప్రభుత్వం ఎదురు చూస్తోంది. శాసనసభలో బిల్లును ప్రవేశపెట్టేందుకు గవర్నర్ సమ్మతి కోరిన ప్రభుత్వం.. రెండుమార్లు లేవనెత్తిన అభ్యంతరాలకు వివరణ ఇచ్చింది. ఒకవేళ గవర్నర్ సమ్మతి ఇస్తే వెంటనే అసెంబ్లీలో ప్రవేశపెట్టి ఆమోదించుకునే ఆలోచనలో ప్రభుత్వం ఉంది. ఆర్టీసీ బిల్లు విషయంలో గవర్నర్ తీసుకునే నిర్ణయంపై ఆధారపడి పరిణామాలు మారే అవకాశం ఉంది.