ఈసారి రాష్ట్ర బడ్జెట్ మొత్తం రూ.1.67 లక్షల కోట్ల నుంచి రూ.1.70 లక్షల కోట్ల మధ్య ఉంటుందని విశ్వసనీయ వర్గాల సమాచారం. రాష్ట్ర రాబడులు అంచనాల కంటే తగ్గిన నేపథ్యంలో బడ్జెట్ పరిమాణం ఓట్ ఆన్ అకౌంట్ కంటే 8 నుంచి 10 శాతం తక్కువగా ఉండే అవకాశాలు కనిపిస్తున్నాయి. గతంలో ఓట్ ఆన్ బడ్జెట్ను రూ.1.82 లక్షల కోట్లతో ఆమోదించారు. అయితే మాంద్య పరిస్థితుల ప్రభావం తీవ్రంగా ఉంటుందని భావించిన సీఎం కేసీఆర్ దానికి అనుగుణంగా ప్రస్తుత పద్దుకు తుదిరూపు ఇచ్చారు.
వ్యవ'సాయ' రంగాలకు ప్రాధాన్యం
వ్యవసాయం, సంక్షేమం, సాగునీటి రంగాలకు ఈసారి కూడా అధిక ప్రాధాన్యం ఇస్తున్నారు. ఆర్థిక పరిస్థితుల్లో కొంత ప్రతికూలత ఉన్నప్పటికీ వీటికి కేటాయింపులు తగ్గించకుండా ముందుకు వెళ్లాలని ప్రభుత్వం నిర్ణయించింది. తెరాస ఎన్నికల హామీలు, సంక్షేమ కార్యక్రమాల అమలుకు బడ్జెట్లో పెద్దపీట వేయనున్నారు.
వాస్తవిక పద్దు
రాష్ట్ర బడ్జెట్ను పూర్తి వాస్తవిక దృక్పథంతో రూపొందించామని సీఎం కేసీఆర్ అన్నారు. ఇప్పటిదాకా బడ్జెట్ అంటే అంకెల గారడీ అన్న భావనను మార్చబోతున్నామని పేర్కొన్నారు. పూర్తి స్థాయి పద్దు నూతన ఒరవడి సృష్టిస్తుందని తెలిపారు. తాత్కాలిక బడ్జెట్ కంటే ఈసారి కేటాయింపులు తక్కువగా ఉంటాయని వివరించారు.
ఇదీ చూడండి : కేసీఆర్ కేబినెట్లో 18కి చేరిన మంత్రుల సంఖ్య
