విద్యాసంస్థల మూసివేతపై ప్రభుత్వం పునరాలోచించాలి: ఆర్.కృష్ణయ్య

రాష్ట్రంలో విద్యాసంస్థలు మూసివేయడం వల్ల ప్రైవేటు ఉపాధ్యాయులు తీవ్ర ఇబ్బందులు ఎదుర్కొంటున్నారని బీసీ సంక్షేమ సంఘం జాతీయ అధ్యక్షుడు ఆర్. కృష్ణయ్య అన్నారు. మూసివేతపై ప్రభుత్వం పునరాలోచించాలని కోరారు. లేదంటే ఉద్యమాలు ఉద్ధృతం చేస్తామని హెచ్చరించారు.

రాష్ట్రంలో విద్యాసంస్థల మూసివేతపై ప్రభుత్వం పునరాలోచించాలని బీసీ సంక్షేమ సంఘం జాతీయ అధ్యక్షుడు ఆర్.కృష్ణయ్య కోరారు. కరోనాను సాకుగా చూపి... కొందరు అధికారుల తప్పుడు సమాచారంతో విద్యాసంస్థలను మూసివేయటం సరికాదన్నారు. ప్రభుత్వ నిర్ణయంతో విద్యార్థులు కూలీలుగా మారుతున్నారని వాపోయారు. హైదరాబాద్ నారాయణగూడలో 14బీసీ సంఘాల ప్రతినిధులతో కృష్ణయ్య సమావేశం నిర్వహించారు.

విద్యాసంస్థలు మూసివేయడం వల్ల విద్యార్థులు జ్ఞానసంపదను కోల్పోతారని... ప్రైవేటు పాఠశాలల ఉపాధ్యాయులు రోడ్డున పడే పరిస్థితి నెలకొందన్నారు. పక్కరాష్ట్రాల్లో పాఠశాలలు, కళాశాలలు ఎలాంటి ఇబ్బందులు లేకుండా నడుస్తున్నాయని... రాష్ట్రంలో వెంటనే పునఃప్రారంభించేందుకు చర్యలు చేపట్టాలని కోరారు.

సినిమా హాళ్లు, వైన్స్​ల వల్ల వైరస్ ఎక్కువగా విస్తరిస్తోందని అన్నారు. వాటిని వదిలేసి.. పటిష్ఠ భద్రత మధ్య నడుపుతున్న విద్యాసంస్థలను మూసివేయడంపై ఆగ్రహం వ్యక్తం చేశారు. ఏప్రిల్ 10లోగా రాష్ట్రంలోని విద్యాసంస్థలను తిరిగి ప్రారంభించాలని డిమాండ్ చేశారు. ప్రభుత్వం సానుకూలంగా నిర్ణయం తీసుకోకపోతే విద్యార్థి, ఉపాద్యాయ సంఘాలతో కలిసి పోరాటాన్ని ఉద్ధృతం చేస్తామని హెచ్చరించారు.

ఇదీ చదవండి: నా భర్తను ఎలా మార్చుకోవాలి?