రేపట్నుంచి మరో విడత పల్లె, పట్టణప్రగతి కార్యక్రమాలు జరగనున్నాయి. గ్రామాల్లో నాలుగో విడతగా, పట్టణాల్లో మూడో దఫా ప్రగతి కార్యక్రమం పదిరోజుల పాటు జరగనుంది. ఇప్పటి వరకు జరిగిన పురోగతిని సమీక్షించుకొని పచ్చదనం, పరిశుభ్రతకు ప్రాధాన్యం ఇస్తూ అవసరమైన పనులు చేపడతారు. మొదటి రోజు గ్రామ, వార్డు సభలు నిర్వహించాల్సి ఉంటుంది. పల్లె, పట్టణప్రగతిలో భాగంగా ఇప్పటి వరకు చేసిన పనులను సభకు నివేదిస్తారు. పంచాయతీ ఆదాయ, వ్యయాలను కూడా వివరిస్తారు. పదిరోజుల పాటు చేసే పనులతో పాటు ఏడాది ప్రణాళిక ఖరారు కోసం అందరి సూచనలు తీసుకుంటారు. విస్తృత ప్రజా భాగస్వామ్యాన్ని ఆహ్వానించడంతో పాటు శ్రమదానంతో పనులు చేసేలా ప్రోత్సహించాల్సి ఉంటుంది. ఆయా ప్రాంతాల్లోని విశ్రాంత ఉద్యోగులు, మాజీ సైనికులను గుర్తించి వారందరినీ కార్యక్రమంలో భాగస్వాముల్ని చేయాలని ప్రభుత్వం ఆదేశించింది.
పారిశుద్ధ్యానికే ప్రాధాన్యత
ప్రగతి కార్యక్రమంలో భాగంగా పారిశుద్ధ్యానికి ఎక్కువ ప్రాధాన్యం ఇస్తారు. ఎక్కడా చెత్త ఉండకుండా చూడడంతో పాటు మురికినీరు నిల్వ ఉండకుండా తగిన చర్యలు తీసుకోవాల్సి ఉంటుంది. శిథిలాల వ్యర్థాలు, పిచ్చిమొక్కలు తొలగించాలి. రహదారులు, ఖాళీస్థలాలను శుభ్రం చేయాలి. వానాకాలం అయినందున సీజనల్ వ్యాధులు ప్రబలకుండా ముందు జాగ్రత్త చర్యలు తీసుకోవాలి. ఎక్కడా నీరు నిల్వ ఉండకుండా చూడడంతో పాటు దోమలు రాకుండా రసాయనాలు పిచికారీ చేయడం లాంటి చర్యలు తీసుకోవాలి. మంచినీటి వనరులను శుభ్రం చేయాలి. పదిరోజుల్లో ఒకరోజు పవర్ డేను పాటించి విద్యుత్కు సంబంధించిన అన్ని సమస్యలను పరిష్కరించాలి. గ్రామాల్లో వైకుంఠధామాలు, డంపింగ్ యార్డులు ఇంకా పూర్తి కాని చోట వెంటనే నిర్మాణాల పూర్తికి చర్యలు తీసుకోవాలి.
ఇంటికి రెండు మొక్కలు
పట్టణాల్లో రెండు ఎకరాలకు పైగా స్థలాలు గుర్తించిన చోట సమీకృత మార్కెట్ల నిర్మాణానికి టెండర్లు ఖరారు చేసి పనులు ప్రారంభించాలని... ఇతర చోట్ల రెండెకరాలకు పైగా స్థలాలను గుర్తించాలని పురపాలకశాఖ ఆదేశించింది. ప్రతి పట్టణంలోనూ మరణించిన వారిని తీసుకెళ్లేందుకు విధిగా కనీసం ఒక వైకుంఠరథం అందుబాటులో ఉండేలా చూడాలని స్పష్టం చేసింది. ఏడో విడత హరితహారం కార్యక్రమాన్ని కూడా ప్రగతిలో భాగంగానే చేపట్టనున్నారు. గ్రామాలు, పట్టణాల్లో రహదారుల వెంట, ఖాళీస్థలాల్లో, ప్రభుత్వ స్థలాల్లో విస్తృతంగా మొక్కలు నాటడంతో పాటు ప్రతి ఇంటికీ ఆరు మొక్కలు ఇవ్వాలి. ఎక్కడైనా ప్రకృతివనాలు పూర్తి కాకపోతే వాటిని పూర్తి చేయాలని ప్రభుత్వం ఆదేశించింది.
అలసత్వం వహిస్తే చర్యలు తప్పువు
మండలస్థాయిలో, పట్టణాల్లో ఐదు నుంచి పదెకరాల విస్తీర్ణంలో బృహత్ ప్రకృతి వనాల ఏర్పాటుకు స్థలాలను గుర్తించి పనులు ప్రారంభించాలి. వందశాతం పన్నుల వసూలుకు కూడా చర్యలు తీసుకోవాలి. పల్లె, పట్టణప్రగతి ప్రారంభం నేపథ్యంలో ముఖ్యమంత్రి కేసీఆర్ ఇప్పటికే కలెక్టర్లు, స్థానికసంస్థల అదనపు కలెక్టర్లు, అధికారులకు మార్గనిర్దేశం చేశారు. పూర్తిస్థాయి చిత్తశుద్ధితో బాధ్యతగా పనిచేయాలని, ప్రజలందరినీ భాగస్వామ్యుల్ని చేయాలని స్పష్టం చేశారు. అలసత్వం వహించే వారిపై చర్యలు తప్పవని హెచ్చరించారు.
ఇదీ చదవండి: Bonalu: తెలంగాణ సంస్కృతి అద్దంపట్టేలా బోనాల నిర్వహణ
