సింగరేణి సంస్థను అత్యుత్తమ అవార్డు వరించింది. థర్మల్ విద్యుత్ కేంద్రం నుంచి వెలువడే ఫ్లైయాష్ను 100 శాతానికి పైగా సద్వినియోగం చేసినందుకు గుర్తింపుగా సింగరేణి థర్మల్ విద్యుత్ కేంద్రానికి ఈ అవార్డు లభించింది. ఫ్లైయాష్ వినియోగంపై మిషన్‌ ఎనర్జీ ఫౌండేషన్‌ ఆధ్వర్యంలో గోవాలో రెండు రోజులుగా జరిగిన అంతర్జాతీయ స్థాయి సదస్సు ముగింపు సందర్భంగా సింగరేణి డైరెక్టర్ డి.సత్యనారాయణరావు ఈ అవార్డును అందుకున్నారు. 500 మెగావాట్ల పైబడి విద్యుత్ను ఉత్పత్తి చేస్తున్న థర్మల్ ప్లాంట్ల విభాగంలో సింగరేణి ఈ అవార్డును అందుకుంది.
సింగరేణికి అవార్డు రావడం పట్ల ఆ సంస్థ సీఎండీ ఎన్‌.శ్రీధర్‌ హర్షం వ్యక్తం చేశారు. సింగరేణి థర్మల్ విద్యుత్ కేంద్రంలో ఫ్లైయాష్, బాటంయాష్లను వంద శాతం సద్వినియోగం చేయాలన్న లక్ష్యానికి అనుగుణంగా మొదటి నుంచే కృషి చేస్తున్నామని.. అందుకు గుర్తింపుగా జాతీయ స్థాయి అవార్డు రావడం సంతోషంగా ఉందన్నారు.
107 శాతం వినియోగం
సింగరేణి థర్మల్ విద్యుత్ కేంద్రం నుంచి వెలువడే ఫ్లైయాష్ను ప్రధానంగా సిమెంట్ కంపెనీలకు రవాణా చేస్తున్నారు. సింగరేణి 2020-21లో 16.86 లక్షల టన్నుల ఫ్లైయాష్ను సిమెంటు కర్మాగారాలకు రవాణా చేసింది. తద్వారా 107 శాతం ఫ్లైయాష్ వినియోగం జరిగిందని సంస్థ వెల్లడించింది. కేశోరాం, ఓరియంట్‌ తదితర 10 సిమెంటు కంపెనీలు సింగరేణి ఫ్లైయాష్ను వినియోగిస్తున్నాయి. ఎన్టీపీసీ, ఎస్‌సీఎల్‌ వంటి ప్రభుత్వ సంస్థలతో పాటు అదానీ, టాటా, జేకే వంటి సుమారు 150 ప్రైవేట్ థర్మల్ విద్యుత్ కేంద్రాలను మించి సింగరేణి థర్మల్ విద్యుత్ కేంద్రం ఈ అవార్డును పొందడం పట్ల సర్వత్రా హర్షం వ్యక్తం అవుతోంది.
ఇదీ చూడండి: ఫూలే ఆలోచనా విధానాన్నే ప్రభుత్వం అమలుచేస్తోంది: కేసీఆర్
