PM Modi Warangal Tour Speech : '9 ఏళ్లుగా తెలంగాణ రాష్ట్రాభివృద్ధికి ఎంతో కృషి చేశాం'

PM Modi Speech at Hanumakonda Public Meeting : తెలుగువారి ప్రతిభ దేశ సామర్థ్యాన్ని పెంచిందని.. దేశాభివృద్ధిలో తెలంగాణ కీలకపాత్ర పోషిస్తోందని ప్రధాని నరేంద్ర మోదీ తెలిపారు. హనుమకొండలో నిర్వహించిన బీజేపీ విజయ సంకల్ప సభలో పాల్గొని.. వివిధ అభివృద్ధి పనులను వర్చువల్​గా ప్రారంభించారు. మోదీ సభకు భద్రతా బలగాలు మూడంచెల పటిష్ఠ బందోబస్తు నిర్వహించాయి.

PM Modi Speech at Warangal Public Meeting : 9 ఏళ్లు పూర్తిచేసుకున్న తెలంగాణ.. దేశాభివృద్ధిలో కీలకపాత్ర పోషిస్తోందని ప్రధానమంత్రి నరేంద్రమోదీ స్పష్టం చేశారు. వరంగల్‌ పర్యటనలో భాగంగా అభివృద్ధి పనులకు ప్రధాని శంకుస్థాపన చేశారు. తెలంగాణలో రైల్వే, రహదారుల కనెక్టివిటీ పెంచుతున్నామని తెలిపారు. తెలుగువారి ప్రతిభ దేశ సామర్థ్యాన్ని పెంచిందని మోదీ చెప్పారు. కొత్త లక్ష్యాల కోసం మరిన్ని మార్గాలు అన్వేషించాల్సిన అవసరముందన్నారు.

అభివృద్ధి కార్యక్రమాలకు శ్రీకారంలో భాగంగా.. 30 ఏళ్ల తర్వాత ఏకశిలానగరంలో దేశ ప్రధానమంత్రి పర్యటించారు. ఉదయం వారణాసి నుంచి ప్రత్యేక విమానంలో హైదరాబాద్‌కు చేరుకున్న ప్రధాని మోదీకి.. హకీంపేట్ విమానాశ్రయంలో సీఎస్ శాంతికుమారి, డీజీపీ అంజనీకుమార్, ఉమ్మడి రాష్ట్రం మాజీ ముఖ్యమంత్రులు కిరణ్‌కుమార్‌రెడ్డి, నాదెండ్ల భాస్కరరావు స్వాగతం పలికారు. అక్కడి నుంచి హెలికాప్టర్‌లో బయలుదేరిన ప్రధాని.. మామునూరు ఏరోడ్రమ్​కు చేరుకున్నారు.

Modi Visited Bhadrakali Temple : అక్కడ కేంద్ర మంత్రి కిషన్ రెడ్డి, ఇతర అధికారులు ప్రధానికి స్వాగతం పలికారు. మామునూరు నుంచి రోడ్డుమార్గాన భద్రకాళీ ఆలయానికి వెళ్లారు. మోదీకి అర్చకులు పూర్ణకుంభంతో స్వాగతం పలికారు. ఈ సందర్భంగా ఆలయ ఆవరణలో మోదీ గో సేవలో పాల్గొన్నారు. అనంతరం భద్రకాళీ అమ్మవారికి ప్రధాని ప్రత్యేక పూజలు నిర్వహించారు. ఈ సందర్భంగా వేదపండితులు ప్రధానికి ఆశీర్వచనాలు అందజేశారు. పూజల్లో భాగంగా భద్రకాళీ ఆలయం చుట్టూ మోదీ ప్రదక్షిణలు చేశారు.

అభివృద్ధి కార్యక్రమాలను వర్చువల్​గా ప్రారంభించిన మోదీ : ఆలయం నుంచి హనుమకొండ ఆర్ట్స్ అండ్ సైన్స్ కళాశాల మైదానానికి చేరుకున్న ప్రధాని.. కేంద్ర మంత్రులు నితిన్‌ గడ్కరీ, కిషన్‌రెడ్డి, గవర్నర్‌ తమిళిసైతో కలిసి అభివృద్ధి కార్యక్రమాలను వర్చువల్‌గా ప్రారంభించారు. రూ.521 కోట్ల వ్యయంతో నిర్మించనున్న కాజీపేట వ్యాగన్ తయారీ పరిశ్రమకు శంకుస్థాపన చేశారు.

రూ.2,147 కోట్ల వ్యయంతో.. జగిత్యాల-కరీంనగర్-వరంగల్ ఇంటర్ కారిడార్​కు, రూ.3,441 కోట్ల వ్యయంతో ఎకనామిక్ కారిడార్‌లో భాగంగా మంచిర్యాల-వరంగల్ జాతీయ రహదారికి ప్రధాని శంకుస్థాపన చేశారు. నూతనంగా ఏర్పాటైన తెలంగాణ రాష్ట్రం ముందు అనేక అవకాశాలు ఉన్నాయని ప్రధాని మోదీ తెలిపారు. 9 ఏళ్లుగా రాష్ట్రాభివృద్ధికి ఎంతో కృషి చేశామన్న మోదీ.. హైవేలు, ఎక్స్‌ప్రెస్‌వేలు, ఇండస్ట్రియల్‌-ఎకనామిక్‌ కారిడార్లు ఏర్పాటు చేస్తున్నట్లు తెలిపారు.

"తెలంగాణ రాష్ట్రం కొత్తదైనా.. భారతదేశాభివృద్ధిలో రాష్ట్ర భాగస్వామ్యం, ప్రజల సహకారం ఎంతో ప్రశంసించదగినది. తెలుగు ప్రజల శక్తియుక్తులు దేశ సామర్థ్యాన్ని బలోపేతం చేశాయి. తొమ్మిదేళ్లలో కేంద్ర ప్రభుత్వం తెలంగాణ అభివృద్ధికి ఎంతో ప్రాధాన్యమిచ్చింది. ఇందులో భాగంగానే రాష్ట్రంలో రూ.6 వేల కోట్లతో అభివృద్ధి పనులకు శ్రీకారం చుట్టాము. భారత్ ​మాల ప్రాజెక్టులో భాగంగా డజన్ల కొద్దీ కారిడార్లను నిర్మిస్తున్నాం. వాటిలో చాలా వరకు తెలంగాణ మీదుగా వెళుతున్నాయి." - నరేంద్రమోదీ, ప్రధానమంత్రి

Modi Warangal Tour : 'మోదీ నేతృత్వంలో తెలంగాణలోనూ ఎన్నో రహదారులు నిర్మించాము. మౌలిక సదుపాయాలకు కేంద్ర ప్రభుత్వం ప్రాధాన్యమిస్తోంది. ఉత్తరాది, దక్షిణాదిని అనుసంధానిస్తూ రహదారులు నిర్మిస్తున్నామని' కేంద్ర రోడ్డు రవాణా, రహదారుల శాఖ మంత్రి నితిన్‌ గడ్కరీ తెలిపారు. ప్రధాని పర్యటన సందర్భంగా పటిష్ఠ భద్రతా ఏర్పాట్లు చేశారు. ఎస్పీజీ, ఆక్టోపస్, గ్రేహౌండ్స్, సివిల్ పోలీసులు.. హనుమకొండలో ప్రధాని పర్యటించే ప్రాంతాలను తమ ఆధీనంలోకి తీసుకుని ఆయా మార్గాల్లో మూడంచెల భద్రత కల్పించారు.

ఇవీ చదవండి :