ఇందిరమ్మ రాజ్యం, సంక్షేమం, అభివృద్ధి అంటే ఇదేనా? : కడియం శ్రీహరి

MLA Kadiyam Srihari Press Meet at Telangana Bhavan : ఇందిరమ్మ రాజ్యం, బ్రహ్మాండమైన సంక్షేమం, అభివృద్ధి అంటే ఇదేనా అంటూ రాష్ట్ర ప్రభుత్వంపై బీఆర్​ఎస్​ ఎమ్మెల్యే కడియం శ్రీహరి ధ్వజమెత్తారు. గత ప్రభుత్వం పథకాలను ఒక్కొక్కటిగా రద్దు చేస్తూ కొత్తవి ఇవ్వడం లేదని విమర్శించారు. హైదరాబాద్​లోని తెలంగాణ భవన్​లో జరిగిన పెద్దపల్లి పార్లమెంటు నియోజకవర్గం సన్నాహక సమావేశంలో తీసుకున్న నిర్ణయాలపై ఎమ్మెల్యే కడియం శ్రీహరి వివరాలు వెల్లడించారు.

MLA Kadiyam Srihari Press Meet at Telangana Bhavan : కాంగ్రెస్​ పార్టీ అధికారంలోకి రావడానికే 420 హామీలు ఇచ్చిందని బీఆర్​ఎస్​(BRS) ఎమ్మెల్యే కడియం శ్రీహరి ధ్వజమెత్తారు. ఇందిరమ్మ రాజ్యం వస్తుందని, బ్రహ్మాండమైన సంక్షేమం, అభివృద్ధి జరుగుతుందని ప్రజలకు భ్రమలు కల్పించారన్నారు. కానీ నెల రోజుల్లోనే ప్రజలకు నిరాశ ఎదురైందని అన్నారు. హైదరాబాద్​లోని తెలంగాణ భవన్​లో జరిగిన పెద్దపల్లి పార్లమెంటు నియోజకవర్గం(Lok Sabha Election 2024) సన్నాహక సమావేశంలో తీసుకున్న నిర్ణయాలపై ఎమ్మెల్యే కడియం శ్రీహరి వివరాలు వెల్లడిస్తూ, కాంగ్రెస్​ పార్టీపై విమర్శలు చేశారు.

కాంగ్రెస్​ ప్రభుత్వం కొత్తవి ఇవ్వకపోగా, గత ప్రభుత్వ పథకాలను ఒక్కొక్కటిగా రద్దు చేస్తోందని ఎమ్మెల్యే కడియం శ్రీహరి ఆవేదన చెందారు. గృహలక్ష్మీ(Gruhalakshmi) కింద కలెక్టర్లు అర్హతలు గుర్తించి లబ్ధిదారులను ఖరారు చేశారని, కొంత మంది ఇళ్ల పనులు ప్రారంభించారని తెలిపారు. కాంగ్రెస్​ ప్రభుత్వం గృహలక్ష్మీ రద్దు చేయడంతో పేదలు రోడ్డున పడ్డారని, ప్రభుత్వం క్షేత్రస్థాయిలో విచారణ జరిపించి ఇందిరమ్మ ఇళ్ల(Indiramma House Scheme) నిర్మాణంలో వారికి తొలి ప్రాధాన్యత ఇవ్వాలని కడియం శ్రీహరి కోరారు.

రాష్ట్రంలో దళిత బంధును కూడా ఆపివేయాలని ఆదేశాలు ఇచ్చారని, రైతు బంధు విషయంలో కూడా జాప్యం జరుగుతోందని కడియం శ్రీహరి అన్నారు. ఎకరాలకు రూ.15 వేలు ఇస్తామని ప్రగల్భాలు పలికిన కాంగ్రెస్​ నేతలు ఇంకా రైతుబంధు ఎందుకు ఇవ్వలేదో చెప్పాలని ప్రశ్నించారు. ఆదాయ వనరులపై అవగాహన లేకుండా ఇబ్బడిముబ్బడిగా హామీలు ఇచ్చారని ధ్వజమెత్తారు. రూ. 2 లక్షల రైతు రుణమాఫీపై తొలి సంతకం అన్నారని, కానీ నేటి వరకు అతీగతి లేకుండా పోయిందని దుయ్యబట్టారు.

Lok Sabha Election 2024 : అలాగే రూ.500 బోనస్​తో వడ్లు కొంటామని చెప్పారు, కానీ అది కూడా చేయడం లేదని కడియం శ్రీహరి అన్నారు. విపరీత హామీలతో ప్రజలను మోసం చేసినట్లు కనిపిస్తోందని ఆరోపించారు. హామీలు అమలు నిలబెట్టుకోలేకనే కాలయాపన చేస్తున్నారని మండిపడ్డారు. మరోవైపు సీఎం రేవంత్​ రెడ్డి ప్రకటనలు రోజుకో రకంగా ఉంటున్నాయని ఆందోళన వ్యక్తం చేశారు. అదానీ పీడ విరగడ అయిందని రేవంత్​ రెడ్డి నాగపూర్​ సభలో చెప్పారని కానీ ఇప్పుడు హైదరాబాద్​లో రెడ్​ కార్పెట్​ వేశారని పేర్కొన్నారు.

గ్యారంటీల్లో ఒక్కో అంశాన్ని అమలు చేసి మొత్తం అమలు చేశామంటే ఎలానని ఎమ్మెల్యే కడియం శ్రీహరి ప్రశ్నించారు. ఇప్పటికైనా ప్రజలను మోసం చేయడం మానుకోవాలని సూచించారు. హస్తం గుర్తుకు ఓటు వేసినందుకు యువకులకు మొండి చేయి చూపించారని, ఏ పథకంపై కూడా రాష్ట్ర ప్రభుత్వానికి స్పష్టత లేదన్నారు. కాంగ్రెస్(Congress Guarantees)​ ఇచ్చిన హామీలను గుర్తు చేస్తున్నామని, ప్రజలకు త్వరగా ఫలాలు అందుతాయని కోరుతున్నామన్నారు. ఎన్నికలకు ముందు ఒక మాట, ఎన్నికల తర్వాత మరో మాట మాట్లాడడం కాంగ్రెస్​ పార్టీ నైజమని బీఆర్​ఎస్​ ఎమ్మెల్యే కడియం శ్రీహరి తీవ్ర ఆరోపణలు చేశారు.