మున్నూరు కాపుల సమస్యల్ని ముఖ్యమంత్రి దృష్టికి తీసుకువెళ్లి పరిష్కారించే విధంగా ప్రయత్నిస్తానని పురపాలక శాఖ మంత్రి కేటీఆర్ హామీ ఇచ్చారు. సికింద్రాబాద్ ఇంపీరియల్ గార్డెన్లో జరిగిన మున్నూరు కాపుల ఆత్మీయ సమ్మేళనానికి ఆయన ముఖ్యఅతిథిగా హాజరయ్యారు. అభివృద్ధి, సుపరిపాలన కావాలంటే జీహెచ్ఎంసీ ఎన్నికల్లో తెరాసకు ఓటు వేసి గెలిపించాలని మంత్రి విజ్ఞప్తి చేశారు.
హైదరాబాద్లో చిచ్చుపెట్టేందుకు విపక్షాలు స్పష్టమైన ఎజెండాతో ముందుకు వెళ్తున్నాయని... ప్రజలు గందరగోళానికి గురికావొద్దని సూచించారు. తెలంగాణకు ఎంతో చేసినట్లు భాజపా నేతలు రుబాబ్ చేస్తున్నారని, ప్రజలకు వాస్తవాలు చెప్పాలని డిమాండ్ చేశారు. ఆరేళ్లలో రాష్ట్రానికి ఇచ్చింది పైసాలేకపోగా... ఇచ్చామంటూ దబాయిస్తున్నారని ఆరోపించారు.
హైదరాబాద్లో వరదలొచ్చి జనం నష్టపోతే పైసా ఇవ్వని కేంద్రం... ప్రజలు ఎందుకు ఓటు వేయాలని ఆయన ప్రశ్నించారు. జీహెచ్ఎంసీ ఎన్నికలకు దిల్లీ నుంచి పెద్దపెద్ద నేతలు హైదరాబాద్కు వస్తున్నారని, వచ్చేటప్పుడు కేసీఆర్ కోరిన వరదసాయం రూ. 1,300 కోట్లు తీసుకురావాలని డిమాండ్ చేశారు.
