తెరాస కార్య నిర్వాహక అధ్యక్షుడు కేటీఆర్ రోడ్షోలతో ప్రచారంలో దూసుకెళ్తున్నారు. 16 మంది ఎంపీలతో కేంద్రంలో నిర్ణయాత్మక శక్తిగా తెరాస అవతరిస్తుందని ధీమా వ్యక్తం చేశారు. ఇద్దరు ఎంపీలతోనే తెలంగాణ సాధించిన వ్యక్తి కేసీఆర్ అని ప్రశంసించారు. ప్రధాని మోదీ దేశానికి చేసింది శూన్యమని విమర్శించారు. సికింద్రాబాద్ తెరాస పార్లమెంటు అభ్యర్థి తలసాని సాయికిరణ్ యాదవ్కు మద్దతుగా జూబ్లీహిల్స్లో జరిగిన రోడ్షోలో పాల్గొన్నారు.
తెలంగాణకు లాభం
బలహీన వర్గాల ముద్దుబిడ్డ సాయికిరణ్ యాదవ్ను ఆశీర్వదించాలని కేటీఆర్ ప్రజలను కోరారు. జాతీయ పార్టీలైన కాంగ్రెస్కు ఓటేస్తే రాహుల్ గాంధీకి, భాజపాకు ఓటేస్తే మోదీకి లాభమని.. కానీ తెరాసకు ఓటేస్తే తెలంగాణ మొత్తానికి లాభమని అన్నారు. ఐదేళ్లలో తెలంగాణ అభివృద్ధిని చూసి ఓటేయాలని విజ్ఞప్తి చేశారు.
మన ఎంపీలతోనే మన రాజ్యం
2014లో కనీస సమాచారం లేకుండా ఖమ్మంలో ఏడు మండలాలను ఒక్క సంతకంతో ఏపీలో కలిపేసుకున్నారని గుర్తు చేశారు. కేంద్రంలో చంద్రబాబునాయుడుకు ఉన్న ఎంపీల బలం వల్లే ఇది సాధ్యమైందని ఉద్ఘాటించారు. హైదరాబాద్ మెట్రోను రూ. 16000 కోట్లతో చేపడుతుంటే కేంద్రం కేవలం రూ. 1200 కోట్లు మాత్రమే ఇచ్చారని అన్నారు. అదనపు నిధులు రావాలంటే మన తెరాస ఎంపీలు 16 మంది ఉండాల్సిందేనని స్పష్టం చేశారు.
మోదీ ఏం చేశారు
దేశ ప్రజల ఆకాంక్షలు నెరవేర్చడంలో ప్రధాని మోదీ విఫలమయ్యారని కేటీఆర్ విమర్శించారు. ప్రజలకు కావలసిన వైద్యం, విద్య, అభివృద్ధి, ఉద్యోగాలు వీటిలో మోదీ ఏం చేశారో చెప్పాలని డిమాండ్ చేశారు. జాతీయ స్థాయిలో ఏ ఒక్క పార్టీకి మెజార్టీ వచ్చే అవకాశాలు లేవని తెలిపారు.
ఇదీ చదవండి : మెట్రో నిర్మాణానికి కేంద్రం ఇచ్చింది 1200 కోట్లే
