కుక్కల గురించి ఆసక్తికర విషయాలు ఇవే!!

హాయ్‌ ఫ్రెండ్స్‌... నేను మీ భౌభౌను.. అదేనండి..  మీరు మీ ఇళ్లలో ముద్దుగా పెంచుకునే కుక్కను.. నేను మీ కళ్లముందే ఉన్నా...  నా గురించి కొన్ని విషయాలు  మీకు తెలియవు...  అవి మీకు చెబుదామని ఇలా వచ్చా!

• పప్పీ.. స్నూపీ.. బ్రౌనీ.. టామీ అని.. ఇలా మీరు ముద్దుగా పిలుచుకుంటారు కానీ... మా శాస్త్రీయ నామం ఏంటో తెలుసా? కీనస్‌ లూపస్‌ ఫామిలేరియస్‌.
• మేం మీకు మంచి విశ్వసనీయ స్నేహితులం.
• ఆదిమ మానవుడు మొదట మచ్చిక చేసుకుంది మమ్మల్నే.
• మాకు వాసన పట్టే శక్తి చాలా ఎక్కువ. మీ కన్నా పదివేల రెట్లు ఎక్కువగా మేం వాసన పసిగట్టగలం. ఇదే మా అసలు సిసలు ప్రత్యేకత.
• అందుకే పోలీసు అంకుల్స్‌ దొంగలను పట్టుకోవడానికి మా సాయం తీసుకుంటారు.
• మేం మీలా అన్ని రంగులు చూడలేం. మేం ప్రధానంగా.. బూడిద, నీలం, పసుపు రంగులు మాత్రమే చూడగలం.
• వినికిడి శక్తిలో మాత్రం మేమే ఉత్తమం. మాకు మీ మనుషుల కన్నా.. పది రెట్లు ఎక్కువ వినే శక్తి ఉంటుంది.
• ఇటీవలే.. సైబీరియాలో 18వేల ఏళ్ల క్రితం చనిపోయినట్లుగా భావిస్తున్న ఒక కుక్కపిల్ల మృతదేహం పరిశోధకులు కనిపెట్టారు.
• ఇది పూర్తిగా మంచులో కూరుకుపోయి ఉండటం వల్ల ఇన్ని సంవత్సరాలైనా దీని శరీరం పాడవకుండా ఉంది.
• తోడేలు నుంచి కుక్కగా మారే పరిణామ క్రమంలో భాగంగా ఏర్పడ్డ జీవిగా దీన్ని శాస్త్రవేత్తలు గుర్తించారు. దీని పళ్లు తోడేలు, కుక్క.. రెండింటినీ పోలి ఉన్నాయి.
• దీనికి డాగోర్‌ అని శాస్త్రవేత్తలు పేరు పెట్టారు. ఇది మా కుక్కలకు పూర్వీకుడు అని అభిప్రాయపడుతున్నారు!
• ప్రపంచవ్యాప్తంగా సుమారు 400 రకాల కుక్కలున్నాయి.
• మేం అన్ని రకాల ఆహార పదార్థాలు తీసుకుంటాం. కూరగాయలు, పప్పులు, గింజలు వంటి శాకాహారం, గుడ్లు, చికెన్‌, మటన్‌, చేపలు వంటి మాంసాహారమూ తీసుకుంటాం. మొత్తంగా మనుషులు ఏం తింటే.. మేమూ అవి తింటాం!
• మేం మా చెవుల్ని కదిలించడానికే 18 కండరాలుంటాయి.
• రెండు సంవత్సరాల పిల్లవాడికి ఎన్ని తెలివితేటలుంటాయో మాకూ అంత తెలివి ఉంటుంది.
• కొన్ని ప్రాంతాల్లో మేం మనుషులకు సంబంధం లేకుండా అడవుల్లోనూ పెరుగుతుంటాం. ఇందులో ఆఫ్రికన్‌ అడవి కుక్క, ఆస్ట్రేలియన్‌ డింగోలు చక్కగా వేటాడతాయి.
• మా జీవిత కాలం 10 నుంచి 15 సంవత్సరాలు.
• మీరు పెద్దైన తర్వాత మీకు 32 పళ్లుంటాయి. మాకేమో 42 పళ్లుంటాయి.
• మేం గంటకు 19 మైళ్ల వేగంతో పరుగెడుతుంటాం.
• మేం పుట్టినప్పుడు మా కళ్లు తెరుచుకోవు. మూడు వారాల తర్వాత మాత్రమే మేం ప్రపంచాన్ని చూడగలం.
• ప్రపంచం మొత్తం మీద దాదాపు 400 మిలియన్‌ కుక్కలున్నట్లు అంచనా!
• ఊబకాయం అనేది మీలాగే మాకూ వచ్చే ఓ జబ్బు!
• ‘ప్రతి కుక్కకూ ఓ రోజు వస్తుంది’ అంటారు కదా.. ఏటా ఆగస్టు 26న ప్రపంచ కుక్కల దినోత్సవం జరుపుతుంటారు.
• మీకో ఆశ్చర్యకరమైన విషయం చెప్పనా?... మీ చేతి వేలి ముద్రలు ఏ ఇద్దరివీ ఒకేలా ఉండవో... మా ముక్కు ముద్రలు కూడా ఏ రెండు కుక్కలవీ ఒకేలా ఉండవు.

సరే ఫ్రెండ్స్‌.. ఇప్పటికే చాలా విషయాలు చెప్పాను. ఉంటాను మరి భౌ.. భౌ.. అదే బైబై!

సుమారు 15000 సంవత్సరాల క్రితం నుంచే మనుషులకు కుక్కలకు స్నేహం కుదిరింది. అప్పటి నుంచే మనుషులు కుక్కల్ని పెంచుకుంటున్నారు.