ప్రశాంతంగా ముగిసిన ముస్లింల ప్రార్థనలు, ఊపిరి పీల్చుకున్న పోలీసులు

Old city riots in Hyderabad హైదరాబాద్​లో ఎమ్మెల్యే రాజాసింగ్​ వివాదాస్పద వ్యాఖ్యలు, నిరసనలు, అరెస్టుల వేళ ఎలాంటి అవాంఛనీయ ఘటనలు తలెత్తకుండా పోలీసులు భద్రతా చర్యలను పటిష్ఠం చేశారు. ప్రధానంగా పాతబస్తీలోని సమస్యాత్మక ప్రాంతాల్లో అడుగడుగునా ర్యాపిడ్ యాక్షన్​ ఫోర్స్​, పోలీసులతో బందోబస్తు ఏర్పాటు చేశారు. శుక్రవారం మక్కా మసీదుతో పాటు నగర వ్యాప్తంగా ముస్లింల ప్రార్థనలను దృష్టిలో ఉంచుకుని ప్రత్యేక నిఘా ఉంచారు. ఎట్టకేలకు అన్నిచోట్లా నమాజ్​లు ప్రశాంతంగా ముగియటంతో పోలీసులు ఊపిరి పీల్చుకున్నారు.

Old city riots in Hyderabad: ఓ వర్గాన్ని లక్ష్యంగా చేసుకుని గోషామహల్ ఎమ్మెల్యే రాజాసింగ్ ఇటీవల అనుచిత వ్యాఖ్యలు చేయటం రాష్ట్రంలో తీవ్ర దుమారం రేపింది. దీంతో భాజపా అధిష్ఠానం ఆయనపై క్రమశిక్షణ చర్యలకు ఉపక్రమించింది. పోలీసులు రాజాసింగ్​ను అరెస్టు చేయగా సాయంత్రమే నాంపల్లి కోర్టు బెయిల్ ఇవ్వటంతో ఆయన బయటికి వచ్చారు. ఈ క్రమంలోనే మరోసారి రాజాసింగ్​ చేసిన వ్యాఖ్యలు విమర్శలకు తావిచ్చింది. దీంతో పోలీసులు రాజాసింగ్​పై పీడీ చట్టం కింద కేసు నమోదు చేసి చర్లపల్లి జైలుకు తరలించారు.

రాజాసింగ్​పై పీడీ చట్టాన్ని వ్యతిరేకిస్తూ బేగంబజాల్, ఎంజే మార్కెట్​లో నిరసన ప్రదర్శన నిర్వహించారు. బేగంబజార్ వ్యాపారులు స్వచ్ఛందంగా దుకాణాలు మూసి వేసి నిరసన తెలిపారు. ఈ రోజు సైతం నిరసనలు కొనసాగే అవకాశం ఉండటంతో ఆయా ప్రాంతాల్లో పోలీసులు బందోబస్తు ఏర్పాటు చేశారు. రాజాసింగ్ వ్యాఖ్యలకు నిరసనగా పాతబస్తీలో గత మూడు రోజుల నుంచి ఆందోళనలు కొనసాగుతున్నాయి. మనోభావాలు దెబ్బతీసేలా ప్రవర్తిస్తున్న రాజాసింగ్​పై చట్టపరంగా కఠిన చర్యలు తీసుకోవాలంటూ నిరసనలు చేపట్టారు.

ప్రశాంతంగా ముగిసిన నమాజ్​లు..: ఈ క్రమంలోనే శుక్రవారం ప్రార్థనలు దృష్టిలో ఉంచుకొని చార్మినార్, మక్కా మసీద్ పరిసరాల్లో ప్రత్యేక బలగాలను మోహరించారు. చార్మినార్​లో నిరసనలు జరిగే అవకాశం ఉండటంతో మక్కా మసీదు పరిసరాల్లో అదనపు బందోబస్తు ఏర్పాటు చేశారు. గస్తీ వాహనాలతో పహారా కాస్తూ ఎలాంటి అవాంఛనీయ ఘటనలు తలెత్తకుండా చార్మినార్ నాలుగు దిక్కులా బారికేడ్లను ఏర్పాటు చేశారు. శాలిబండ, మొగల్​పురా, హుస్సేనీ ఆలం, భవానీ నగర్, షాహీన్ నగర్, డబీర్​పురాతో పాటు పలు ప్రాంతాల్లో బందోబస్తు ఏర్పాటు చేశారు. సునిశిత ప్రాంతాల్లో పోలీసులు అదనపు బలగాలను మోహరించారు. ఎట్టకేలకు అన్నిచోట్లా నమాజ్​లు ప్రశాంతంగా ముగియటంతో పోలీసులు ఊపిరి పీల్చుకున్నారు.

నిరసనలు ఆపేయాలని అసదుద్దీన్​ పిలుపు..: మరోవైపు రాజాసింగ్​ పట్ల పోలీసులు చట్టపరంగా ముందుకెళ్తున్నారని.. నిరసనలు ఆపేయాలని ఎంఐఎం అధినేత, ఎంపీ అసదుద్దీన్ ఓవైసీ పిలుపునిచ్చారు. పలు ముస్లిం మతపెద్దలు సైతం యువకులకు సూచనలు చేస్తున్నారు.

సంబంధిత కథనాలు..:

ఇవీ చూడండి..