రేపట్నుంచి గడ్డిఅన్నారం పండ్ల మార్కెట్ బంద్

హైదరాబాద్ గడ్డిఅన్నారం పండ్ల మార్కెట్‌కు మార్కెటింగ్ శాఖ రేపట్నుంచి సెలవు ప్రకటించింది. ఈ మేరకు వ్యవసాయ మార్కెట్ కమిటీ నోటీసు జారీ చేసింది. మార్కెట్​లో క్రయవిక్రయాలు జరిపేటప్పుడు భౌతిక దూరం పాటించడం, మాస్కులు ధరించడం వంటివి పాటించకపోవటం వల్లే ఈ నిర్ణయం తీసుకున్నట్లు కమిటీ సభ్యులు తెలిపారు.

హైదరాబాద్​ గడ్డిఅన్నారం పండ్ల మార్కెట్​కు రేపట్నుంచి సెలవు ప్రకటిస్తూ వ్యవసాయ మార్కెట్​ కమిటీ నోటీసు జారీ చేసింది. మార్కెట్​ ప్రాంగణంలో భౌతిక దూరం పాటించకపోవడం వల్ల సోమవారం 44 మంది కమిషన్​ ఏజెంట్లపై పోలీసులు కేసు నమోదు చేశారు. భౌతిక దూరం పాటించాలనే ఉద్దేశంతో రంగారెడ్డి జిల్లాలో ఏర్పాటు చేసిన కోహెడ మార్కెట్​.. సుడిగాలి దుమారానికి కుప్పకూలిపోవడం వల్ల గడ్డి అన్నారం మార్కెట్​కు రద్దీ పెరిగింది.

తమకేవీ పట్టవు..!

మార్కెటింగ్ శాఖ, పోలీసులు మైకుల్లో ప్రకటనలు చేసినప్పటికీ... భౌతిక దూరం పాటించడం, మాస్కులు ధరించడం వంటి అంశాల్లో పెద్ద మార్పు కనిపించట్లేదు. దీన్ని దృష్టిలో ఉంచుకుని జనం రద్దీ కట్టడి లక్ష్యంగా మార్కెట్​కు తాత్కాలిక సెలవు ప్రకటించారు. ఇందువల్ల రేపట్నుంచి మామిడికాయల క్రయ, విక్రయాలు, ఇతర లావాదేవీలు నిలిచిపోనున్నాయి.

ఉన్నతాధికారులదే తుదినిర్ణయం..

మార్కెట్ పునఃప్రారంభం ఎప్పుడనేది మార్కెటింగ్​ శాఖ ఉన్నతాధికారులే నిర్ణయిస్తారని కమిటీ ఉన్నత శ్రేణి కార్యదర్శి యండ్రపల్లి వెంకటేశం తెలిపారు. భవిష్యత్తులో మార్కెట్​ తెరిచినా.. రోజూ కొద్ది మందికి మాత్రమే క్రయవిక్రయాలు జరిపే అవకాశం ఇస్తామని ఆయన పేర్కొన్నారు.

ఇదీ చదవండిః హైదరాబాద్​ను కమ్మేస్తున్న కరోనా..నగరవాసుల హైరానా..