ఆంధ్రప్రదేశ్లోని స్వర్ణ ప్యాలెస్ అగ్నిప్రమాద ఘటనలో రమేష్ ఆసుపత్రి ఎండీ డా. రమేష్ బాబు, ఛైర్మన్ సీతారామమోహన్ హైకోర్టులో దాఖలు చేసిన క్వాష్ పిటిషన్లపై విచారణ జరిగింది. స్వర్ణ ప్యాలెస్ కొన్నేళ్లుగా నగరంలో హోటల్గా కొనసాగుతుందని పిటిషనర్ తరఫున సీనియర్ న్యాయవాది దుమ్మాలపాటి శ్రీనివాస్ వాదించారు.
స్వర్ణప్యాలెస్లో కొవిడ్ కేర్ సెంటర్ నిర్వహించేందుకు జిల్లా వైద్యాధికారి అనుమతినిచ్చినట్లు ధర్మాసనం దృష్టికి తీసుకెళ్లారు. గతంలో ఈ హోటల్లో ఎయిర్ పోర్ట్ క్వారంటైన్ నిర్వహించారని తెలిపారు. కొవిడ్ కేంద్రంలో జరిగిన ప్రమాద ఘటనతో రమేశ్ ఆసుపత్రి యాజమన్యానికి సంబంధం లేదన్నారు. ఈ అంశాలను పరిగణనలోకి తీసుకున్న పోలీసులు నమోదు చేసిన కేసులో తదుపరి చర్యలను నిలువరిస్తూ మధ్యంతర ఉత్తర్వులు ఇవ్వాలని న్యాయవాది శ్రీనివాస్ కోరారు.
వారిపై ఎందుకు కేసు పెట్టలేదు..?
విచారణలో భాగంగా ధర్మాసనం కొన్ని కీలక వ్యాఖ్యలు చేసింది. కొవిడ్ కేర్ సెంటర్ నిర్వహించేందుకు కలెక్టర్, సబ్ కలెక్టర్ అనుమతినిచ్చారు కదా? వారిని ఈ కేసులో ఎందుకు చేర్చకూడదు? అని ప్రభుత్వ న్యాయవాదిని ధర్మాసనం కోరింది. కేసు ఇంకా విచారణలో ఉందని ప్రభుత్వ న్యాయవాది తెలిపారు. ఈ సమయంలో కేసులో మధ్యంతర ఉత్తర్వులు ఇవ్వొద్దని ఆయన అభ్యర్ధించారు. ఇరువురి వాదనలను పరిగణనలోకి తీసుకున్న న్యాయస్థానం ఆసుపత్రి యాజమాన్యంపై నమోదు చేసిన కేసులో తదుపరి చర్యలను నిలువరిస్తూ మధ్యంతర ఉత్తర్వులను జారీ చేసింది.
విజయవాడ స్వర్ణప్యాలెస్లో ఈ నెల 9వ తేదీన తెల్లవారుజామున అగ్నిప్రమాదం జరిగింది. ఈ ఘటనపై గవర్నర్పేట్ పోలీస్ స్టేషన్లో కేసు నమోదైన విషయం తెలిసిందే.
ఇదీ చదవండి: ఎంత ప్రశ్నించినా మౌనమే తహసీల్దార్ సమాధానం
