'సీజనల్​ పండ్ల అమ్మకాలకు మీరేం చేస్తున్నారు'

లాక్​డౌన్​లో రైతులు సీజనల్ పండ్లు అమ్ముకునేందుకు ఎలాంటి ఉత్తమ ఏర్పాట్లు చేయగలరో ఈనెల 13లోగా తెలపాలని ప్రభుత్వాన్ని హైకోర్టు ఆదేశించింది. సీజనల్​ పండ్ల అమ్మకాల కోసం ప్రత్యేక సంతలు ఏర్పాటు చేసేలా ప్రభుత్వాన్ని ఆదేశించాలని నిర్మల్​కు చెందిన ఓ విశ్రాంత పశువైద్యుడు దాఖలు చేసిన పిల్​పై ధర్మాసనం విచారణ చేపట్టింది.

సీజనల్​ పండ్ల అమ్మకాల కోసం ప్రత్యేక సంతలు ఏర్పాటు చేయాలని నిర్మల్​కు చెందిన విశ్రాంత పశువైద్యుడు కే నారాయణ రెడ్డి దాఖలు చేసిన ప్రజా ప్రయోజన వ్యాజ్యంపై హైకోర్టులో విచారణ జరిగింది. ప్రధాన న్యాయమూర్తి జస్టిస్ ఆర్ఎస్ చౌహాన్, జస్టిస్ బీ విజయసేన్​ రెడ్డి ధర్మాసనం వీడియో కాన్ఫరెన్స్​ ద్వారా విచారణ చేపట్టింది. లాక్​డౌన్ వల్ల సీజనల్ పండ్ల వ్యాపారులు నష్టపోతున్నారని పిటిషనర్ తరఫు న్యాయవాది తెలిపారు.

గ్రామీణ, పట్టణ ప్రాంతాల్లో సీజనల్ విక్రయాల కోసం ప్రత్యేక మార్కెట్లు ఏర్పాటు చేయాలని కోరారు. లాక్​డౌన్​ ఉన్నప్పటికీ పండ్లు అమ్ముకునేందుకు అనుమతి ఉందని అడ్వొకేట్ జనరల్ బీఎస్ ప్రసాద్ నివేదించారు. వాదనలు విన్న హైకోర్టు... లాక్​డౌన్ వేళ సీజనల్ పండ్ల అమ్మకాల కోసం రెడ్, ఆరెంజ్, గ్రీన్ జోన్ల వారీగా ఎలాంటి మంచి ఏర్పాట్లు చేయగలరో ఈ నెల 13 లోగా తెలపాలని ప్రభుత్వాన్ని ఆదేశించింది.

ఇవీ చూడండి: మందుబాబులను చితకబాదిన మహిళ