వర్షం కారణంగా హైదరాబాద్‌లోని పలు ప్రాంతాల్లో రహదారులపై భారీగా వరదనీరు నిలిచిపోయింది. ఎల్బీనగర్‌ వద్ద జాతీయ రహదారి డివైడర్‌ పైనుంచి వరదనీరు పొంగిపొర్లటంతో దాదాపు రెండు కిలోమీటర్ల మేర వాహనాలు నిలిచిపోయాయి. పనామా- ఎల్బీనగర్‌ రహదారి జలమయం కావడం వల్ల వాహనదారులు తీవ్ర అవస్థలు పడ్డారు. మెహదీపట్నం, బయోడైవర్సిటీ, గచ్చిబౌలి రహదారిపై వాహనాలు నెమ్మదించాయి. గచ్చిబౌలి, నానక్‌రామ్‌గూడ, నార్సింగి, లంగర్హౌస్, మెహదీపట్నం మీదుగా వాహనాలను దారి మళ్లించారు.
జల దిగ్బంధంలోనే
గోల్నాక కొత్త వంతెనపై భారీగా ట్రాఫిక్ జాం అయింది. ముసారాంబాగ్‌ వంతెనపై రాకపోకలు నిషేధించారు. గోల్నాక వంతెనపై నుంచి వాహనాల దారిమళ్లింపుతో... అక్కడ రద్దీ పెరిగింది. ఉప్పల్‌లో వరంగల్‌ జాతీయ రహదారిపై వరద ప్రవాహంతో... వాహనాల రాకపోకలకు అంతరాయం ఏర్పడింది. వర్షం ధాటికి ఫలక్‌నుమా ఓవర్‌ బ్రిడ్జిపై గుంత ఏర్పడింది. ఇటీవల కురిసిన వర్షానికి మూడు రోజుల పాటు ఈ వంతెన జలదిగ్బంధంలోనే ఉంది.
అర్ధరాత్రి వరకు
మరికొన్ని ప్రాంతాల్లో అర్ధరాత్రి వరకు ట్రాఫిక్ స్తంభించింది. చంపాపేట, సంతోష్‌నగర్, సాగర్‌రింగ్ రోడ్డు, చింతల్‌కుంట ప్రాంతాల్లో కిలోమీటర్ల మేర ట్రాఫిక్ జాం ఏర్పడింది. మాదాపూర్, నానక్రాంగూడ, గచ్చిబౌలి, రాయదుర్గం ప్రాంతాల్లో వర్షానికి ట్రాఫిక్ పూర్తిగా నెమ్మదించింది. రద్దీ నియంత్రణకు దుర్గం చెరువు కేబుల్ బ్రిడ్జిని తెరిచి... వాహనాలను అనుమతించారు. బెంగళూరు జాతీయ రహదారిపై భారీగా వరదనీరు చేరడం వల్ల రాకపోకలకు ఇబ్బంది ఏర్పడింది. ముందు జాగ్రత్తగా గగన్‌పహాడ్‌ వైపు వాహనాల రాకపోకలను నిలిపివేశారు. పీవీ ఎక్స్‌ప్రెస్‌ వే మీదుగా బెంగళూరు, విమానాశ్రయం వెళ్లే వాహనాలను దారి మళ్లించారు. బెంగళూరు వైపు వెళ్లే వాహనదారులు.. ఓఆర్‌ఆర్‌ మీదుగా వెళ్లేలా ఏర్పాట్లు చేశారు.
ఇదీ చదవండి: కిట్లో రూ.2,800 విలువ చేసే నిత్యావ‌స‌రాలు, 3 దుప్పట్లు: కేటీఆర్‌
