ఆషాడమాసంలో బోనాల ఉత్సవాలు నేటి నుంచి ప్రారంభం కానున్నాయి. గోల్కొండ జ‌గ‌దాంబిక అమ్మవారికి తొలి బోనం స‌మ‌ర్పించ‌డంతో... హైదరాబాద్‌లో ఉత్సవాలు మొదలుకానున్నాయి. గోల్కొండ బోనాలు ముగిసిన మరుసటి వారం లష్కర్ బోనాలు జరగనున్నాయి. కరోనా కారణంగా ప్రజలు తగిన జాగ్రత్తలు పాటిస్తూ అమ్మవారికి బోనం సమర్పించుకోవాలని పోలీసులు సూచిస్తున్నారు.
బోనాన్ని మ‌హిళ‌లే త‌యారు చేస్తారు..
కుటుంబ బాంధ్యవాల‌తో పెన‌వేసుకుపోయిన బంధం బోనం. స్త్రీ.. శ‌క్తికి ప్రతిరూపం. సంప్రదాయానికి చిహ్నం. అందుకే ఈ బోనాన్ని మ‌హిళ‌లే త‌యారు చేస్తారు. గ్రామ దేవ‌త‌ల‌కు ప‌సుపు కుంకుమ‌లు, చీర సారెలు, నైవేద్యాల‌ు సమర్పించి మొక్కులు చెల్లించుకుంటారు. ఎల్లమ్మ, మైస‌మ్మ, పోచ‌మ్మ, ముత్యాల‌మ్మ, పెద్దమ్మ ఇలా శ‌క్తి స్వరూప‌మైన అమ్మవార్ల వ‌ద్ద త‌మ‌ను చ‌ల్లగా చూడ‌మ‌ని వేడుకుంటారు. త‌మ కుటుంబానికి, గ్రామానికి ఏ ఆప‌ద రాకుండా ర‌క్షించ‌మ‌ని ప్రార్థిస్తారు.
ఇదే ఆనవాయితీ..
రాష్ట్రంలో బోనాలు తొలిసారిగా గోల్కొండ జగదాంబ అమ్మవారి ఆలయంలోనే ప్రారంభం కావడం ఆనవాయితీ. నేడు ప్రారంభమయ్యే బోనాల సందడి... వచ్చే నెల 8 వరకు కొనసాగుతుంది. ప్రతి గురువారం, ఆదివారం బోనాలను భక్తి శ్రద్ధలతో నిర్వహిస్తారు.
'తెలంగాణలో తొలుత గోల్కొండ జగదాంబ అమ్మవారి ఆలయంలోనే బోనాలు జరుగుతాయి. ఇక్కడ తొమ్మిది పూజలు జరుగుతాయి. ఐదురోజు చంఢీయాగం, ఏడోరోజు అమ్మవారి సేవ, తొమ్మిదో రోజు కుంభ హారతి కార్యక్రమం జరుగుతుంది'.
- సర్వేశ్‌చారి, ఆలయ పూజారి
'అక్కన్న మాదన్న ఉన్నప్పుడి నుంచే బోనాలు వైభవంగా నిర్వహించేవారు. అన్ని కులాలవారితో కలిసి అమ్మవారి వద్దకు బోనాలు తీసుకొస్తాం'.
- సాయిబాబా చారి, ఆలయ కమిటీ సభ్యుడు
'గత ఏడాది కరోనా కారణంగా బోనాలను వైభవంగా నిర్వహించుకోలేకపోయాం. కొవిడ్ నిబంధనల మేరకే ఈసారి బోనాలు నిర్వహిస్తాం. మాస్క్ లేకుండా ఆలయం లోపలికి అనుమతించం'.
- శివశంకర్, ఆలయ కమిటీ సభ్యుడు
ఉత్సవాల్లో భాగంగా లంగర్ హౌస్ నుంచి తొట్టెల ఊరేగింపు జరగనుంది. మంత్రులు ఇంద్రకరణ్‌ రెడ్డి, తలసాని శ్రీనివాస్ యాదవ్ బగ్గీపై ఊరిగింపుగా వచ్చి... అమ్మవారికి పట్టు వస్త్రాలు సమర్పించనున్నారు. ఉత్సవాల్లో భాగంగా జగదాంబ అమ్మవారికి తొమ్మిది రకాల ప్రత్యేక పూజలు నిర్వహిస్తారు. గోల్కొండ బోనాల సందర్భంగా పోలీసులు పటిష్ఠ భద్రత ఏర్పాట్లు చేశారు. సుమారు 600 మందికిపైగా పోలీసులు బందోబస్తు విధులు నిర్వహించనున్నారు. దర్శనం కోసం వచ్చే భక్తులు విధిగా కరోనా నిబంధనలు పాటించాలని కోరారు.
'ప్రజలకు ఇబ్బంది లేకుండా అన్ని ఏర్పాట్లు చేశాం. భక్తులందరూ కొవిడ్ నిబంధనలు పాటించాలి. భక్తుల భద్రతను దృష్టిలో పెట్టుకొని చర్యలు తీసుకొంటున్నాం'.
- ఏఆర్. శ్రీనివాస్, పశ్చిమ మండలం డీసీపీ
బోనం నైవేద్యంగా స‌మ‌ర్పించే తంతును ఊర‌డి అంటారు. గ్రామాల్లో దీన్నే పెద్ద పండుగ, ఊర పండుగ వంటి పేర్లతో పిలుస్తారు. బోనాల పండుగలో శివసత్తుల విన్యాసాలు, పోతరాజుల నృత్యాలు ప్రత్యేక ఆకర్షణగా నిలవనున్నాయి.
ఇవీచూడండి: Bonalu: అంబరాన్నంటే సంబురం.. బోనాల ఉత్సవం
