- మూడు నెలల బిల్లు ఒకేసారి ఇవ్వడం వల్ల స్లాబులు మారిపోయే అవకాశముందని వినియోగదారులు అనుమానం వ్యక్తం చేస్తున్నారు? అలా స్లాబులు మారే అవకాశం ఉందా..?
ఏప్రిల్ నెలలో 150, మే లో 160 యూనిట్లు, జూన్లో 130-140 యూనిట్లు వస్తాయనుకుంటే... మూడు నెలలకు కలిపి సుమారు 420-450 యూనిట్లు అనుకుంటే మొత్తం యూనిట్లను 3తో భాగించి... సుమారు 113 యూనిట్లు వస్తుంది. ఆ స్లాబ్ బిల్లును మాత్రమే వేస్తాం. ఎట్టి పరిస్థితుల్లో స్లాబ్ మారే అవకాశం ఉండదు. వినియోగదారులు చింతించాల్సిన అవసరం లేదు. వినియోగదారులు ఎప్పటికైనా బిల్లు కట్టాల్సిందే.
అనూహ్యంగా బిల్లు ఎక్కువగా వచ్చిన వారి బిల్లులను పరిశీలిస్తున్నాం. విద్యుత్ ఉత్పత్తిదారులకు మేం ముందే డబ్బులు చెల్లిస్తున్నాం..అప్పుడే వినియోగదారులకు విద్యుత్ అందించగలుగుతున్నాం. అందుకే దయచేసి విద్యుత్ బిల్లులు చెల్లించండని విజ్ఞప్తి చేస్తున్నాం.
ఆన్లైన్ విద్యుత్ చెల్లింపులు ఏమేరకు జరుగుతున్నాయి..?
ఎస్పీడీసీఎల్ బిల్లులను ఆన్లైన్లో చెల్లించవచ్చు. దీనితో పాటు యాప్ను రూపొందించాం. మార్చిలో 42 లక్షల వినియోగదారుల్లో 26 లక్షల వినియోగదారులు ఆన్లైన్లో కట్టారు. ఏప్రిల్లో 27 లక్షల మంది వినియోగదారులు బిల్లులు చెల్లిస్తే.. 22.5 లక్షల మంది ఆన్లైన్లో కట్టారు. మేలో 14.8 లక్షల వినియోగదారులు బిల్లులు చెల్లిస్తే.. అందులో 12 లక్షల వినియోగదారులు ఆన్లైన్లో చెల్లించారు. అంటే దాదాపు 75 నుంచి 80శాతం వినియోగదారులు లాక్డౌన్ తర్వాత ఆన్లైన్లో చెల్లింపులు చేస్తున్నారు. లాక్డౌన్కు ముందు 50 నుంచి 60శాతం వినియోగదారులు మాత్రమే ఆన్లైన్లో చెల్లించేవారు.
- టీఎస్ఎస్పీడీసీఎల్ మొబైల్ యాప్లో ఏమేం వివరాలు ఉంటాయి..?
టీఎస్ ఎస్పీడీసీఎల్ సంస్థ సొంతంగా టీఎస్ ఎస్పీడీసీఎల్ మొబైల్ యాప్ను రూపొందించింది. ఇందులో విద్యుత్ కొత్త కనెక్షన్ నుంచి బిల్లు ఎక్కువ వచ్చినా.. బిల్లు రాకపోయినా ఫిర్యాదు చేయవచ్చు. డబ్బులు కూడా ఆన్లైన్లో చెల్లించవచ్చు.
- బిల్లుల్లో గందరగోళం మొదలైంది. దానికి టోల్ ఫ్రీ నంబర్ ఏదైనా ఏర్పాటు చేశారా?
వినియోగదారుల ఫిర్యాదు కోసం 1912 కస్టమర్ కేర్ నంబర్ను ఏర్పాటు చేశాం. ఇందులో కంప్యూటర్ ఆపరేటర్లు 24 గంటలు అందుబాటులో ఉంటారు. మూడు షిప్టుల్లో 24 మంది పనిచేస్తుంటారు. వీళ్లు అన్ని రకాల ఫిర్యాదులు స్వీకరిస్తారు. బిల్లింగ్ ఫిర్యాదులు, విద్యుత్ సరఫరా ఫిర్యాదులు, కొత్త కనెక్షన్ ఇలా ఎటువంటి ఫిర్యాదు అయినా స్వీకరిస్తారు. సరఫరాకు సంబంధించిన ఫిర్యాదులను 2-3 గంటల్లో, బిల్లింగ్ సంబంధించిన ఫిర్యాదులను 24-48 గంటల్లో రిప్లయ్ ఇస్తారు.
