'కరోనాను ఎదుర్కొనేందుకు అనేక పరిశోధనలు.. ఆవిష్కరణలకు ప్రాణం'

దేశంలో కరోనా వెలుగుచూసిన నాటి నుంచి వైరస్‌ను ఎదుర్కొనేందుకు సీసీఎంబీ అనేక పరిశోధనలు చేస్తోంది. వివిధ సంస్థలతో పనిచేస్తూ... వివిధ ఆవిష్కరణలకు ప్రాణం పోస్తోంది. ఇటీవల గాలిలో వైరస్ వ్యాప్తిపై సైతం పరిశోధనలు చేస్తోంది. రోగ నిరోధకత పెంచేందుకు పుట్టగొడుగులతో యాంటీవైరల్‌ ఉత్పత్తి కరోనా ఎయిడ్‌ తీసుకొచ్చింది. ఈ నేపథ్యంలో సీసీఎంబీ డైరెక్టర్ డాక్టర్ రాకేశ్ కె.మిశ్రాతో ఈటీవీ భారత్ ప్రతినిధి రమ్య ముఖాముఖి...

ఈటీవీ భారత్​​: ఈ పుట్టగొడుగుల ఉత్పత్తి కరోనా ఎయిడ్‌ గురించి వివరించగలరా?

మిశ్రా: ఇది పుట్టగొడుగుల ద్వారా తీసిన పొడి. ఈ పుట్టగొడుగులను ప్రజలు చాలా ఏళ్లుగా ఆహారంగా తీసుకుంటున్నారు. గతంలో అందుబాటులో ఉన్న పరిశోధనల ఫలితాల ఆధారంగా ఈ పుట్టగొడుగుల్లో యాంటీ వైరల్‌ గుణాలు ఉంటాయని తెలుసు. మా పరిశోధనల్లో ఇది కరోనాను సమర్థంగా ఎదుర్కొంటున్నట్లు గుర్తించాం. మానవ శరీరంలోనూ ఇది వైరస్‌ పెరుగుదలను నియంత్రించగలదని ఆశిస్తున్నాం. ఏళ్లుగా ఈ పుట్టగొడుగులను ఆహారంగా తీసుకుంటున్నారు కాబట్టి దుష్ఫలితాలు ఎక్కువగా ఉండవు. ఎక్కువ ట్రయల్స్‌ కూడా అవసరం ఉండదు. వీటన్నింటి దృష్ట్యా ఎఫ్‌ఎస్‌ఎస్‌ఐ సైతం దీనిని అమ్మేందుకు అనుమతి ఇచ్చింది.

ఈటీవీ భారత్​​: హిమాలయాల్లో పెరిగే ఈ పుట్టగొడుగులను ఇక్కడ ఎలా పెంచుతారు?

మిశ్రా: ఈ పుట్టగొడుగులు హిమాలయాల్లోని కొంతకాలం మాత్రమే పెరుగుతాయి. ఆ తర్వాత అత్యంత చలిలో పెరగలేవు. ఇవి పెరిగే ప్రత్యేక పరిస్థితులను ప్రయోగశాలలో కల్పించాం.

ఈటీవీ భారత్​​: దేశంలో ఇప్పటికే 30 శాతం మందికి కరోనా సోకిందని... త్వరలోనే అది 50 శాతానికి పెరగవచ్చని కొన్ని పరిశోధనలు చెబుతున్నాయి. ఇందుకు సంబంధించిన శాస్త్రీయ ఆధారాలు ఏమైనా అందుబాటులో ఉన్నాయా?

మిశ్రా: 30 శాతం మందికి వైరస్‌ సోకిందని చెప్పేందుకు సరిపడా ఆధారాలు మన దగ్గర లేవు. వేలమంది నుంచి సేకరించిన వివరాలను కోట్లమందికి ఆపాదించలేం.

ఈటీవీ భారత్​​: ఫిబ్రవరిలోగా కరోనా నుంచి బయటపడతామని నిపుణుల కమిటీలు చెబుతున్నాయి. దీనిపై మీ అభిప్రాయం?

మిశ్రా: కొన్ని నగరాల నుంచి సేకరించిన వివరాలతో దేశం మొత్తం గురించి మాట్లాడటం సరికాదు. ఎంతమందికి వైరస్‌ సోకుతోంది? ఎంతమంది మరణిస్తున్నారనే వివరాలు సేకరించడం అంత సులభం కాదు. ఫిబ్రవరిలోగా మనం మహమ్మారి నుంచి బయటపడతామని నేను అనుకోవడం లేదు. కొన్ని ప్రాంతాలు బయటపడినా... మరికొన్నింటిలో ఇంకా పెరగవచ్చు.

ఈటీవీ భారత్​​: మోనోక్లోనల్‌ యాంటీబాడీ థెరపీపై మీ ఆలోచనలు పంచుకోగలరా?

మిశ్రా: ఇమ్యునో థెరపీ అనేది ఓ మంచి ప్రత్యామ్నాయం. ఇది వైరస్‌తో సహజంగా పోరాడటమే కానీ యాంటీబాడీస్‌ వేరే చోట ఉత్పత్తి చేసి శరీరంలో ప్రవేశపెడతారు. ప్రస్తుత పరిస్థితిని అధిగమించేందుకు అనుసరిస్తున్న అనేక మార్గాల్లో ఇది ఒకటి.

ఈటీవీ భారత్​: సీసీఎంబీలో జరుగుతున్న పరిశోధనల్లో ఇటీవల ఏమైనా ప్రగతి సాధించారా?

మిశ్రా: చాలా పరిశోధనల్లో సానుకూల ఫలితాలు వస్తున్నాయి. వివిధ సంస్థలతో ఉన్న ఒప్పందాల దృష్ట్యా వాటి గురించి ఇప్పుడు ప్రస్తావించలేం. కానీ అనేక యాంటీవైరల్‌ ఉత్పత్తులు రాబోతున్నాయి.

ఈటీవీ భారత్​: గాలిలో వైరస్‌ క్రియాశీలతపై జరుగుతున్న పరిశోధల్లో ఏమైనా ప్రగతి సాధించారా?

మిశ్రా: గాలి నుంచి శాంపిళ్ల సేకరణ జరుగుతోంది. చాలా ఆసుపత్రులు మాకు సహకరిస్తున్నాయి. 10- 12రోజుల్లో ఈ పరిశోధన ఫలితాలు వెల్లడిస్తాం.

ఇవీ చూడండి: మద్దతు ధర చెల్లించి మక్కలు కొనుగోలు చేస్తాం: సీఎం