నగలు వేసుకుంటున్నారని దిల్లీ నుంచి వచ్చి చోరీ...!

విలాసవంతమైన జీవితం గడిపేందుకు దిల్లీ నుంచి వచ్చి మరీ హైదరాబాద్​లో చోరీలకు పాల్పడుతోంది ఓ దొంగల ముఠా. తాళాలు వేసి ఉన్న ఇళ్లను లక్ష్యంగా చేసుకుని దోపిడీ చేస్తున్న ముఠాలో ఇద్దరిని పోలీసులు అరెస్టు చేశారు. నిందితుల నుంచి నగదు, ఆభరణాలు, పిస్టోల్​ స్వాధీనం చేసుకున్నారు. బంగారు ఆభరణాలు ఎక్కువ వేసుకుంటారనే కారణంగానే నగరాన్ని ఎంచుకున్నట్లు నిందితులు చెప్పటం కొస మెరుపు.

తాళాలు వేసి ఉన్న ఇంటిని టార్గెట్ చేస్తూ... దోపిడీకి పాల్పడుతున్న ఓ అంతర్రాష్ట్ర ముఠాను సెంట్రల్ జోన్ పోలీసులు అరెస్ట్ చేశారు. నిందితుల నుంచి రూ.50 వేల నగదు, ఓ నాటు తుపాకీ, 8 రౌండ్ల బుల్లెట్లు, బంగారు ఆభరణాలు స్వాధీనం చేసుకున్నారు.సెప్టెంబర్​ 15న సింధి కాలనీకి చెందిన సచిన్ చౌదరి నివాసముంటున్న సాయిశరణ్​ అపార్ట్​మెంట్​లో దొంగతనం జరిగింది. బాధితులు పోలీసులకు ఫిర్యాదు చేశారు. సీసీటీవీ కెమెరాల ద్వారా దర్యాప్తు చేపట్టిన పోలీసులు నిందితులు వాడిన ద్విచక్రవాహనాన్ని గుర్తించారు. వాహనం ఆధారంగా... దిల్లీకి చెందిన రాజ్ కుమార్ శర్మ, సచిన్ కుమార్​ను సికింద్రాబాద్​లో అరెస్ట్ చేశారు. మరో నిందితుడు మహమ్మద్ షారుక్ పరారీలో ఉన్నట్లు పోలీసులు తెలిపారు.

నగర సందర్శనకని నమ్మించి...

దిల్లీకి చెందిన రాజ్​కుమార్ శర్మ, సచిన్ కుమార్, మహమ్మద్ షారుక్ ముగ్గురు కలిసి హైదరాబాద్​లో ఉన్న సందర్శన ప్రదేశాలకు వెళ్తున్నట్లు స్నేహితుడిని నమ్మించారు. అతని దగ్గర నుంచి రెండు ద్విచక్రవాహనాలు తీసుకుని నగరంలో రెక్కి నిర్వహించారు. సింధి కాలనీని ఎంచుకున్న నిందితులు... మొదట ఒక అపార్ట్​మెంట్​కు వెళ్లారు. జనాలు ఎక్కువగా ఉండటం వల్ల భయపడి పక్కనే ఉన్న శరణ్​ అపార్ట్​మెంట్​లోకి వెళ్లారు. వారితో పాటు ఒక నాటుతుపాకీని తీసుకెళ్లారు. దొంగతనం చేసి... స్నేహితున్ని తీసుకుని దిల్లీకి పరారయ్యారు. నిందితులు రాజ్ కుమార్​శర్మ, సచిన్​కుమార్ మరో దోపిడీ చేసేందుకు నగరానికి మంగళవారం వచ్చారు. పోలీసులకు సమాచారం రావటంతో నిందితులిద్దరిని సికింద్రాబాద్ రైల్వేస్టేషన్ వద్ద అదుపులోకి తీసుకున్నారు.

ఇవీ చూడండి: 'వైష్ణవ జన తో' గీతంతో మహాత్ముడికి ఈటీవీ భారత్​ ఘన నివాళి