పరీక్ష ఆగింది.. ఆందోళన మొదలైంది!

నగరంలో కేసులు పెరగడం వల్ల ప్రజల్లో ఆందోళన రోజురోజుకు పెరుగుతున్నది. చిన్న చిన్న లక్షణాలున్నా జనాలు భయపడుతున్నారు. ఆ భయంతోనే చాలామంది పరీక్షా కేంద్రాలకు పోటెత్తుతున్నారు. అయితే.. ముందస్తు సమాచారం లేకుండా అర్ధాంతరంగా పరీక్షలు ఆపేయడం వల్ల పరీక్షా కేంద్రాలకు వచ్చిన వారంతా అసహనంతో వెనుదిరుగుతున్నారు.

నగర శివారులోని అబ్దుల్లాపూర్​మెట్​ ప్రాంతంలో ఉంటున్న ఓ యువకుడికి కొద్దిరోజులుగా సుస్తీ చేసింది. కోరనా భయంతో జూన్​ 25న పరీక్షలు చేయించుకునేందుకు సరూర్​ నగర్​లోని కరోనా పరీక్షా కేంద్రానికి వెళ్లాడు. తీరా అక్కడికి వచ్చిన తర్వాత పరీక్షలు చేయడం లేదంటూ వెనక్కి పంపారు. ఏం చేయాలో తెలియక.. అతనిలో మరింత ఆందోళన మొదలైంది. ఎల్బీ నగర్​, హయత్​ నగర్​, సరూర్​ నగర్​ పరిధిలో సరూర్​ నగర్​ తహశీల్దార్​ కార్యాలయంలో ఒకే కరోనా నిర్ధారణ పరీక్షా కేంద్రం ఏర్పాటు చేశారు. ఈ నెల 20 నుంచి అక్కడ కరోనా పరీక్షలు చేస్తున్నారు. నిత్యం దాదాపు 300 పైగా అనుమానితులు ఇక్కడికి వస్తున్నారు. కరోనా భయంతో ఈ నెల 25న వచ్చిన బాధితులు.. ఇక్కడ పరీక్షలు నిర్వహించడం లేదన్న సమాధానంతో వెనక్కి తిరిగారు.

నగర వ్యాప్తంగా వారు రోజులుగా పలు ప్రభుత్వ కార్యాలయాలు, ఆసుపత్రులు కేంద్రంగా కరోనా పాజిటివ్​ నిర్ధారణ పరీక్షలు చేస్తున్నారు. ఇప్పటి వరకు దాదాపు 30వేల పరీక్షలు చేసినట్లు అధికారులు చెప్తున్నారు. వీటిలో దాదాపు 8 వేల దాకా ఫలితాలు రావాల్సి ఉంది. వాటిని పూర్తి చేశాకే.. తిరిగి కొత్త పరీక్షలు నిర్వహించేందుకు రెండు రోజుల ప టు తాత్కాలికంగా పరీక్షలు నిలిపివేశారు. గోల్కొండ, రామంతాపూర్​ ప్రాథమిక వైద్య కేంద్రాలు, అంబర్​ పేట పీహెచ్​సీ, జియాగూడ, మల్కాజ్​గిరి జిల్లా ఆసుపత్రి, ఆయుర్వేద దవాఖాన, అమీర్​పేట ప్రకృతి చికిత్సాలయం, సూరారం రాజీవ్​ గృహకల్పలో వారం రోజులుగా పరీక్షలు నిర్వహిస్తున్నారు.

ప్రస్తుత పరిస్థితి ఇలా ఉంటే.. నగరంలో కొద్దిరోజులుగా చేస్తున్న నిర్ధారణ పరీక్షల్లో తరచూ తప్పిదాలు చోటు చేసుకుంటున్నాయి. తాజాగా బండ్లగూడ పరిధిలో ఓ వ్యక్తి ప్రైవేట్​ ల్యాబ్​లో పరీక్షలు చేయించుకున్నాడు. ఆ పరీక్షల్లో అతడికి కరోనా పాజిటివ్​ వచ్చింది. స్థానిక అధికారులకు ఈ విషయం గురించి సమాచారం లేకపోవడం వల్ల ఆయనను ఎవరూ సంప్రదించలేదు. ఏం చేయాలో తెలియక.. ఇంటికే పరిమితమయ్యాడు. మహేశ్వరంలోని ఓ అంగన్​వాడీ టీచర్​కి పాజిటివ్​ వచ్చింది. అధికారులు ఆమెకు ఫోన్​ చేయకుండా.. అదే పేరుతో ఉన్న మరో ఏఎన్​ఎంకు ఫోన్​ చేశారు. అధికారుల తప్పిదం వల్ల ఆ ఏఎన్​ఎం కుటుంబ సభ్యులు ఆందోళన చెందారు. కొద్దిసేపటికి పొరపాటును గమనించిన అధికారులు మళ్లీ ఆమెకు ఫోన్​ చేసి పొరపాటు గురించి చెప్పడం వల్ల వారు ఊపిరి పీల్చుకున్నారు. ప్రస్తుత పరిస్థితుల్లో అధికారుల అలసత్వం వల్ల కూడా కేసులు రోజురోజుకు పెరుగుతున్నాయి. ఇప్పటికైనా అధికారులు అప్రమత్తంగా ఉండి విధులు నిర్వర్తిస్తే పరిస్థితి కొంతవరకు అదుపులోకి రావచ్చంటున్నారు ప్రజలు.

ఇవీ చూడండి: పచ్చని పండుగ: హరిత తెలంగాణే లక్ష్యం... ప్రతిమొక్కనూ బతికిద్దాం