కరోనాతో పర్యాటక రంగం పూర్తిగా దెబ్బతింది. గతేడాది విలయం నుంచి కోలుకుంటున్న క్రమంలో రెండోదశ మరింత నష్టాన్ని చేకూర్చింది. కరోనా కారణంగా పర్యాటక ప్రాంతాలు మూసివేయడంతో వాటిని నమ్ముకున్న వారు రోడ్డునపడే పరిస్థితి నెలకొంది. ఫొటోగ్రాఫర్లు, గైడ్లు, శిక్షకులు, ట్రావెల్స్‌లో పనిచేసే డ్రైవర్లు తీవ్ర అవస్థలు పడుతున్నారు. కనీసం తమను పట్టించుకునేవారే లేరని ఆవేదన వ్యక్తం చేస్తున్నారు.
కొంతమంది ఆదాయం లేక గ్రామాలకు వెళ్లి వ్యవసాయం, కూలీ పనులు చేసుకుంటున్నారు. మరికొందరు ప్రత్యామ్నాయం లేక పస్తులుంటున్నారు. గోల్కొండ కోట ముందు రోజూ 40 మంది గైడ్లు ఉదయం, సాయంత్రం వచ్చి సందర్శకులు ఎప్పుడు వస్తారా? అని ఆశగా చూస్తున్నారు. అక్కడే తమ కష్టాలు పంచుకుంటూ ఓదార్చుకుంటున్నారు. పూట గడవడమే కష్టంగా మారిందని.. ప్రభుత్వం తమను ఆదుకోవాలని వేడుకుంటున్నారు.
