తెలంగాణ రాష్ట్రంలోని 17 పార్లమెంటు నియోజక వర్గాల్లో గెలుపోటములపై గాంధీభవన్ లెక్కలు కడుతోంది. ఏయే నియోజక వర్గాల్లో ఏయే పార్టీలకు బలం ఉంది, ఏ నేతలు బలహీనంగా ఉన్నారు... అక్కడున్న తాజా రాజకీయ పరిణామాలు ఏమిటనే అంశాల ఆధారంగా విజయావకాశాలపై లెక్కలు వేస్తోంది. హైదరాబాద్‌ మినహా 16 పార్లమెంటు స్థానాలు తమవే అంటూ అధికార పార్టీ ధీమాగా ప్రచారంలో దూసుకుపోతోంది. అసెంబ్లీలో ఓటమి చవి చూసిన కాంగ్రెస్.. ఈసారైనా సత్తా చాటాలని సర్వశక్తులు ఒడ్డుతోంది. కేంద్రంలో పాగా వేయటమే లక్ష్యంగా బలమైన అభ్యర్థులను బరిలోకి దించింది. ప్రచారంలో ప్రజాస్పందన, అభ్యర్థుల బలాబలాలు పరిశీలించి... గెలుపోటములపై ఒక అంచనాకు వచ్చినట్లు తెలుస్తోంది.
కొత్త వ్యక్తులు కావడం వల్ల లాభిస్తోంది
మల్కాజిగిరి, నల్గొండ స్థానాల్లో తెరాస కొత్త వ్యక్తులు మర్రి రాజశేఖర్ రెడ్డి, వేమిరెడ్డి నరసింహారెడ్డిను బరిలోకి దింపిడం, వారు ప్రచారాల్లో అంతగా దూసుకుపోలేకపోవడం, అభ్యర్థులు రేవంత్ రెడ్డి, పీసీసీ అధ్యక్షుడు ఉత్తమ్‌కుమార్‌ రెడ్డిలు అందరి మద్దతు కూడగట్టుకుంటూ అన్ని వర్గాలకు దగ్గరవడం చూసి తమ విజయం ఖాయమనే ధీమాతో హస్తం నేతలు ఉన్నారు. చేవెళ్లలో సిట్టింగ్‌ ఎంపీ కావడం, గత ఐదేళ్ల కాలంలో ఆయన చేసిన అభివృద్ధికి తోడు అధికార పార్టీకి చెందిన అభ్యర్ధి రంజిత్‌ రెడ్డి రాజకీయాలకు కొత్తకావడం కలిసొస్తున్న అంశమని పార్టీ లెక్కలు కడుతోంది. ఖమ్మంలో కాంగ్రెస్ అభ్యర్థి కేంద్ర మాజీ మంత్రి రేణుకా చౌదరి బలమైన అభ్యర్థి కావడం, అధికార పార్టీ అభ్యర్థి నామా నాగేశ్వరరావు తెదేపా నుంచి వలస రావడంతో పార్టీలోని నేతల మధ్య సఖ్యత లేకపోవడం లాంటివి ఇక్కడ లాభిస్తాయని అంచనాకు వచ్చింది. ఈ కారణాలతో ఈ నాలుగు చోట్ల కాంగ్రెస్ అభ్యర్థుల గెలుపునకు ఢోకా లేదన్న ధీమా హస్తం పార్టీలో వ్యక్తమవుతోంది.
ఇక్కడ గట్టి పోటీ ఇస్తాం..
భువనగిరిలో తెరాస అభ్యర్థి బూర నర్సయ్యగౌడ్‌... కాంగ్రెస్ అభ్యర్థి కోమటిరెడ్డి వెంకటరెడ్డికి గట్టి పోటీ ఇస్తున్నట్లు పార్టీ అంచనా వేస్తోంది. ఇక్కడ కోమటి రెడ్డి సోదరులు ఎలాగైనా పార్లమెంటు స్థానాన్ని తమ ఖాతాలో వేసుకోవాలని సర్వశక్తులు ఒడ్డుతున్నారు. పెద్దపల్లి, మహబూబాబాద్‌ల్లో కూడా ఇదే పరిస్థితి. మహబూబాబాద్‌లో కేంద్ర మాజీ మంత్రి బలరాంనాయక్‌, తెరాస తరఫున మాలోత్ కవిత బరిలో ఉన్నారు. బలరాంనాయక్‌ గతంలో ఎంపీ కావడం, కేంద్ర మంత్రిగా పని చేసిన అనుభవం వల్ల... అక్కడ అన్ని వర్గాలను సమీకరించడంలో సఫలీకృతులయ్యారని హస్తం పార్టీ భావిస్తోంది.
సికింద్రాబాద్లోనూ కష్టమే...
ఇక హైదరాబాద్‌ పార్లమెంటు నియోజక వర్గం ఎంఐఎంను ఓడించడం కష్టమని తేలిపోయింది. సికింద్రాబాద్ నుంచి అంజన్‌కుమార్‌ యాదవ్‌ బరిలో ఉన్నారు. అధికార పార్టీ తరఫున మంత్రి తలసాని కుమారుడు ఎత్తులు, పైఎత్తులతో ముందుకు వెళ్లుతున్నారు. మరో వైపు భాజపా అభ్యర్థి కిషన్‌ రెడ్డి క్షేత్ర స్థాయిలో బలమైన శక్తిగా ఎదిగినట్లు కాంగ్రెస్ అంచనా వేస్తోంది. మహబూబ్నగర్ పార్లమెంటు స్థానం నుంచి మాజీ మంత్రి, ఇటీవల భాజపాలో చేరిన డీకే ఆరుణ బరిలో ఉన్నారు. అక్కడ కాంగ్రెస్ నుంచి వంశీచంద్‌ రెడ్డి, తెరాస నుంచి మన్నె శ్రీనివాస రెడ్డిలు పోటీలో ఉన్నప్పటికీ... ఈ రెండు పార్టీల కంటే కూడా కాషాయదళ అభ్యర్థే బలమైన శక్తిగా మారినట్లు అంచనా వేస్తున్నారు.
ఇవీ చదవండి: నేనూ కొత్తేమీ కాదు... ఎప్పటి నుంచో ప్రజాసేవలో ఉన్నా
