రాష్ట్రంలో కరోనా ఉద్ధృతితో ప్రజలు విలవిల్లాడుతుంటే మినీ పురపోరు యథావిధిగా నిర్వహిస్తామని రాష్ట్ర ఎన్నికల కమిషన్ ప్రకటించడంపై కాంగ్రెస్ తీవ్రంగా మండిపడింది. కొవిడ్ నిబంధనలు పాటించడం లేదని రాజకీయ నాయకులను తప్పుబడుతున్న ఎస్ఈసీ.. తన బాధ్యతను ఎందుకు విస్మరిస్తుందో చెప్పాలని కాంగ్రెస్ ఎన్నికల సమన్వయ కమిటీ కన్వీనర్‌ జి.నిరంజన్‌ ప్రశ్నించారు.
ఇవాళ విడుదల చేసిన నోటిఫికేషన్‌లో తమకున్న విశేష అధికారాలను, సుప్రీంకోర్టు తీర్పులను కమిషన్ పేర్కొనడం ఏంటని ఆయన ప్రశ్నించారు. ఆ విశేష అధికారాలను అభ్యర్థుల ప్రచారాన్ని కుదింపు చేయడానికి ఉపయోగించిన కమిషన్.. ఎన్నికలను వాయిదా వేయడానికి ఎందుకు ఉపయోగించలేదని నిలదీశారు. మున్సిపల్ ఎన్నికలు ఇప్పటికే ఆలస్యమయ్యాయంటున్న ఎన్నికల కమిషన్.. రాష్ట్రంలో ఖాళీగా ఉన్న జడ్పీటీసీ, ఎంపీటీసీ, సర్పంచ్ పదవుల ఎన్నికలను ఎందుకు ప్రకటించ లేదని మండిపడ్డారు. కరోనా తీవ్రతను పట్టించుకోకుండా ఎన్నికలను నిర్వహించాలని కమిషన్ నిర్ణయం తీసుకోవడం దురదృష్టకరమన్నారు.
ఇదీ చూడండి: 'కరోనా విజృంభిస్తోంది... మున్సిపల్ ఎన్నికలు వాయిదా వేయండి'
